Inflacioni kapi gjatë muajit prill vlerën më të lartë të këtij viti në 1,9%. Megjithatë të dhënat e INSTAT tregojnë se rritja e çmimeve u mbështet sërish vetëm te produktet ushqimore, kryesisht zarzavatet, perimet, vajrat dhe pijet alkoolike.
Kjo do të thotë se shqiptarët po shpenzojnë vetëm për ushqim dhe kjo ka shkaktuar edhe rritjen e çmimeve të produkteve ushqimore, duke dhënë ndikim në treguesin e inflacionit.
Një ndikim më të vogël ka dhënë shtrenjtimi i paketave celulare. Për thuajse të gjitha kategoritë e tjera, çmimet kanë qëndruar të njëjta, për të treguar se kriza e konsumit vazhdon të jetë këmbëngulëse.
Në raport edhe me një vit më parë, shpenzimet për argëtim, akomodim, veshje dhe pajisje kanë mbetur të pandryshuara. Për këtë situatë, bizneset fajësojnë masat shtrënguese si kufizimi i orarit, ndërsa pasiguritë tek familjet janë ende të larta.
