Ambasada e SHBA-ve në Tiranë ka dhënë një mesazh të rëndësishëm për zgjedhjet e 14 majit në vendin tonë.
Në njoftimin e ambasadës, thuhet se zgjedhjet duhet të kryhen në përputhje me ligjin shqiptar. Po ashtu, thuhet se zgjedhjet duhet të jenë të lira, transparente dhe të sigurta.
Ambasada shprehet gjithashtu se përfaqësues ndërkombëtarë do të vëzhgojnë me kujdes procesin.
“Të dielën, qytetarët shqiptarë do të ushtrojnë të drejtën e tyre demokratike më themelore – të votojnë për udhëheqësit dhe të ardhmen e tyre. Ambasada e Shteteve të Bashkuara u bën thirrje të gjitha partive politike dhe institucioneve që të sigurojnë që veprimtaritë zgjedhore të kryhen në përputhje me ligjin shqiptar dhe me standardet ndërkombëtare.
Autoritetet shqiptare duhet të sigurojnë që zgjedhjet të jenë transparente, të lira dhe të sigurta. Ashtu si në procese të mëparshme, përfaqësues ndërkombëtarë, përfshirë nga ambasada e SHBA do të udhëtojnë përreth vendit si vëzhgues në zgjedhje. Zgjedhjet janë themeli i demokracisë. Drejtuesit e partive patën detyrimin të propozojnë kandidatë të pastër, të denjë për të përfaqësuar popullin shqiptar dhe tani vendimi duhet të jetë në dorën e qytetarëve. Siç kemi bërë gjatë tre dhjetëvjeçarëve të shkuar, Shtetet e Bashkuara do të mbështesin vullnetin e popullit shqiptar për demokraci të fortë”, thuhet në njoftimin e ambasadës së SHBA-ve.
Discussion about this post