Ndonëse të shtunën shpalli konstituimin e Kuvendit të Kosovës edhe pa u zgjedhur nënkryetari nga komuniteti serb, kryeparlamentari Dimal Basha ka thirrur mbajtjen e mbledhjes së Kryesisë të hënën pas mesdite.
“Takim konsultativ se si do ta vazhdojë punën Kuvendi i Kosovës,” thuhet tek pika e rendit të ditës sipas njoftimit të dërguar zyra e shtypit.
Në njoftim bëhet e ditur se në takim janë thirrur katër nënkryetarët e zgjedhur të parlamentit. Kryesia e re aktualisht përbëhet nga kryetari Dimal Basha dhe nënkryetarët Albulena Haxhiu, Vlora Çitaku, Kujtim Shala dhe Emilja Rexhepi.
Por Partitë që legjislaturën e kaluar ishin në opozitë, PDK-ja dhe LDK-ja, thanë se nuk do të marrin pjesë në mbledhjen e së hënës, pasi Kuvendi nuk është konstituuar.
Sipas tyre u shkel Kushtetuta dhe Rregullorja e Punës së Kuvendit, e cila thekson se seanca konstituive konsiderohet e përfunduar me zgjedhjen e Kryetarit dhe nënkryetarëve të Kuvendit.
“PDK e konsideron të pakuptimtë ftesën për takim të Kryesisë së Kuvendit që nuk është konstituuar dhe nuk merr pjesë në takime të tilla, të cilat i shërbejnë vetëm agjendave partiake e jo interesit të shteti,” thuhet në njoftimin e PDK-së.
Ndërsa, kryetari i LDK-së, Lumir Abdixhiku, tha se Basha ka konstatuar gabimisht se seanca është konstituuar, meqë Kushtetuta e thotë qartë që një gjë e tillë konsiderohet vetëm pasi të jenë zgjedhur të gjithë nënkryetarët.
“Nuk marrim pjesë në çmenduri të tilla,” u shpreh ai.
Kryeparlamentari Basha tha legjislatura e nëntë të organit ligjvënës të vendit konsiderohet e konstituuar, pasi anëtarë të partisë më të madhe të serbëve të Kosovës, Lista Serbe dhe as kryetari i Partisë për Liri, Drejtësi dhe Mbijetesë, Nenad Rashiq, nuk arritën të marrin votat e nevojshme në raundet e treta të votimit që u mbajtën për ta.
Discussion about this post