Të përjashtuarit nga tenderët, në 6 muaj masa ndaj 10 kompanive

Publikimi periodik i Agjencisë së Prokurimit Publik tregon se të paktën dhjetë operatorë janë përjashtuar këtë vit nga pjesëmarrja e tyre në garat që financohen me para publike.

Përjashtimet e tyre variojnë në afate 6 muaj deri në 12 muaj. Ndërkohë nëse shohim listën e plotë të operatorëve të përjashtuar nga prokurimet totali llogaritet në 17 subjekte dhe afatet e ndalimit të pjesëmarrjes janë edhe më të gjata me maksimumi 30 muaj.

Në listën e operatorëve të përjashtuar bien në sy kompani të sigurisë fizike, kompani të tregtimit të pajisjeve kompjuterike dhe teknologji, por edhe fusha të tjera të lidhura me materialet shëndetësore apo ndërtim.

Sipas kuadrit ligjor autoritetet konstaktore kanë të drejtë të bëjnë ankesa lidhur me sjelljen e operatorëve ekonomikë dhe në rastet kur shihen të arsyeshme ato përjashtohen nga pjesëmarrja në procedurat e prokurimit.

Përjashtimet janë një procedurë periodike ku operatorët që hasen në shkelje bëhen pjesë e masave. Në vitin e kaluar APP mori në shqyrtim m 112 raste për përjashtimin e operatorëve ekonomikë, nga e drejta për të fituar kontrata publike.

Sipas shifrave nga 112 rastet e propozuara për përjashtimin:

– 57 raste referohen për keqinformim dhe paraqitje të dokumenteve me të dhëna të rreme sipas parashikimeve të nenit të 78/1/a të LPP;

– 1 rast referohet për keqinformim dhe paraqitje të dokumenteve me të dhëna të rreme, sipas parashikimeve të nenit 7 të Ligjit për Ankandin Publik;

– 54 raste referohen për mos përmbushje të detyrimeve kontraktuale, sipas parashikimeve të nenit 78/1/b të LPP.

Por jo për të gjitha rastet që ka ankimime bëhet përjashtim io operatorëve. Pas vlerësimit të të dhënave APP vitin e shkuar mori masa për të paktën 38 prej tyre.

“ Në kuadër të procedimit administrativ ndaj operatorëve ekonomikë: – është marrë vendimi për përjashtimin nga e drejta për të fituar kontrata publike, për 38 operatorë ekonomikë, sipas parashikimeve të nenit 78/1 të LPP. – është vendosur mos përjashtimi për 13 operatorë ekonomikë për shkak se, nuk plotësoheshin kushtet e parashikuara në nenin 78 të LPP. – është vendosur pezullimi i procedimit për 11 operatorë ekonomikë, për shkak të procesit gjyqësor” do të raportonte APP për 2022-in.

Marrë nga Monitor