Fondi Shqiptar i Zhvillimit ka hapur një tjetër projekt në Durrës, sikur të mos mjaftojnë aferat e deritanishme që po vjedhin para nga qytetarët durrsakë. Ndërtimi i sheshit “Veliera” është një nga ato projekte i cili prej vitesh po gllabëron miliona lekë nga taksapaguesit shqiptarë. Vlera e këtij projekti deri më tani ka shkuar 10 milionë euro, por deri në fundi të këtij viti janë parashikuar dhe shumë shpenzime të tjera. Po pa u mbyllur kjo “plagë” FSHZH iu hap durrsakëve një tjetër. Është shpalosur plani për rindërtimin e shëtitores bregdetare Ura Dajlanit- Plepa. Kështu pak ditë më parë FSHZH ka hapur tenderin për këtë projekt, për të cilin ka lënë në dispozicion si fond fillestar 416 milionë lekë. Sipas të dhënave të tenderit, kompanitë e interesuara kanë afat deri më 15 korrik të paraqesin ofertat. Ndër të tjera bëhet me dije se , ‘Durrës Waterfront’ do të jetë një aset i shtuar ‘Durrës Yacht & Marina’ dhe e anasjelltas. Këto dy zona zhvillimi do të jenë një vazhdimësi e njëra-tjetrës, duke bërë kështu një lidhje të aktiviteteve që do të jenë të shpërndara në to.
Në dokumentet fillestare të tenderit shëtitorja është ndarë në 3 fragmente, të cilët janë: Fragmenti 1 – Nga Ura e Dajlanit deri tek Pista ‘Kosova’; fragmenti 2 – Nga Pista ‘Kosova’ deri tek Hotel ‘Adriatik dhe fragmenti 3 – Nga Hotel ‘Adriatik’ deri tek Konvaleshenca
Zona e Shëtitores së Plazhit nga Ura e Dajlanit deri tek godina e Konvaleshencës ndodhet 4 kilometra larg nga qendra e qytetit të Durrësit dhe gjithashtu është në vijë të parë lidhjeje me urën e Dajlanit dhe portin e Durrësit. Kjo zonë ka një vijë bregdetare të gjatë prej 3.2 kilometrash, përfshirë këtu dhe zonën në të cilën është konceptuar projekt ideja e “Durrës Waterfront”. Ndër aktivitetet kryesore në zonë janë plazh, hoteleri, restorante, sporte në rërë dhe një shëtitore këmbësore me gjerësi rreth 2-3 m midis brezit të rërës dhe objekteve ndërtimore, e ndërtuar rreth viteve 2004- 2005. Që në ato vite Bashkia Durrës hapi një tender për ndërtimin e shëtitores Ura-Dajlanit-Plepa dhe rrugën kryesore, por asaj kohe pa ndonjë arsye të kuptueshme katër kompanitë e interesuara u tërhoqën nga projekti, duke bërë që planet të shtyhen.
Pas kësaj u bë e mundur vetëm ndërtimi i rrugës që lidh këto dy pika, por shëtitorja nuk u përmend më. Si duket FSHZH solli në tavolinë këtë projekt, si një problem shtesë, për qytetarët shqiptarë për të zbehur kështu vëmendjen nga Veliera, ura që nuk po përfundon kurrë. Ky projekt të lënë hapësirë që të krahasohet me katrahurën që po ndodh për Velieran, pasi edhe për të nuk është hapur asnjë konsultim publik, asnjë marrje mendimi me ekspert të mjedisit apo grupet e interesit. Nuk është përcaktuar nëse nga ky projekt do të preken shtëpi, apo biznese që mund të shemben. Pra FSHZH ka menduar vetëm për tenderin, që mund ta përfitojë një nga oligarkët mik të qeverisë, por detajet e tjera nuk i interesojnë. Duke qenë se qytetarëve nuk iu është marrë asnjë mendim apo konsultim në lidhje me këtë, atyre iu mbetet vetëm të presin e të paguajnë 416 milionë lekëshin.
Derdhen lekë për shëtitore, të prekurit nga tërmeti ende në çadra
“E gjithë vija bregdetare prej 3 km nga ura e Dajlanit deri tek zona e njohur si Plepat në Durrës, do të shndërrohet në një Lungomare të ngjashme me atë Vlorës. Të bëjmë një shqiponjë që të duket nga sipër dhe do t’i japë shumë përfitime bashkisë…”, ka thënë Edi Rama 2 muaj më parë, por si duket kryeministri po harron që vendi është në kohë krize.
Nuk dimë nëse ky projekt do na bëjë që të harrojmë skandalin me Velieran, apo do shtojë listën e skandaleve dhe aferave korruptive. Por, dihet me siguri se shumë familje të prekura nga tërmeti në Durrës kanë më shumë nevojë për një shtëpi se sa për një shëtitore. Çdo ditë në media qytetarët ankohen se Bashkia Durrës nuk iu jep përgjigje se kur do të futen në banesat e reja, ndërsa një pjesë e mirë e tyre shprehen nuk kanë marrë as bonusin e qirasë. Bashkia Durrës edhe disa tenderë që ka hapur për rindërtimin i ka bërë ato shkelje të ligji, duke penguar kështu ecjen e projektit në rrugën e duhur. “Shtëpitë nuk ndërtohen as për një muaj, as për një vit të gjitha”, ka thënë Rama në takimet me të prekurit nga tërmeti. Por, kanë kalua gati 3 vjet dhe qeveria mendon se si të shpenzojë për projekte që mund të presin.
Discussion about this post