Të shtëna gjatë festës në Tiranë/ Tre persona plagosen me armë zjarri

Tre persona janë plagosur me armë zjarri në Tiranë, orët e para të mëngjesit. Sipas policisë, të lënduarit janë jashtë rrezikut për jetën.

Referuar një rindërtimi paraprak të ngjarjes nga blutë, tre personat ishin në një festë familjare, kur në një moment, një tjetër dyshohet se ka shkrepur në mënyrë të pavullnetshme një armë zjarri, duke i lënë të plagosur.

“Më datë 23.07.2024, rreth orës 01:35, janë paraqitur në një spital privat, për ndihmë mjekësore, shtetasit E.P., 36 vjeçe, A.P., 36 vjeç, dhe D.P., 34 vjeç, me dëmtime të shkaktuara dyshohet nga armë zjarri. Këta shtetas, rreth orës 01:30 të mëngjesit të sotëm, kanë qenë duke festuar së bashku me persona të tjerë nga rrethi i tyre shoqëror dhe familjar, në një lokal në Rrugën e Kavajës”, njoftoi policia.

“Nga tërësia e veprimeve hetimore paraprake është bërë i mundur identifikimi i autorit të dyshuar, shtetasit E.E., 32 vjeç, banues në Tiranë. Ky shtetas dyshohet se aksidentalisht, me një armë zjarri të cilën e mbante pa leje, ka bërë një shkrepje të pavullnetshme, dhe si pasojë e saj janë dëmtuar shtetasit e mësipërm”, shtuan të njëjtat burime.

“Shtetasit D.P., dhe A.P., pas marrjes  së ndihmës mjekësore janë larguar për në banesë, ndërsa shtetasja E. P., ndodhet në spital, nën kujdesin e mjekëve, jashtë rrezikut për jetën. Grupi hetimor, nën drejtimin e Prokurorisë, po vijon punën për dokumentimin e plotë ligjor të këtij rasti dhe kapjen e shtetasit E.E.”, mbyllet njoftimi i bluve.

Lexo edhe:

Plagosja e trefishtë gjatë festës në Tiranë, në kërkim djali i biznesmenit – Detajet