Të shtëna me armë jashtë gjyqit në Gjermani për vrasjen e boksierit shqiptar Besar Nimani, plagoset i vëllai

Të shtëna me armë janë shënuar sot jashtë sallës së gjyqit në Gjermani, ku po vazhdon procesi për vrasjen fatale të boksierit shqiptar Besar Nimani.

Nimani u qëllua për vdekje gjatë darkës së tij në një kafene në Gjermani pranverën e kaluar, ndërsa një nga vrasësit e tij është ende në arrati.

Gjatë të shtënave me armë zjarri, u plagosën disa persona, mes tyre edhe vëllai i Besar Nimanit.

Sipas raportimeve, ai ka marrë një plagë në këmbë, por ndodhet jashtë rrezikut për jetën.

Gazeta gjermane “Bild” bën të ditur se përveç vëllait të Nimanit, është plagosur edhe babai i të pandehurit për vrasjen e boksierit. Ai dyshohet se është qëlluar në zonën e kraharorit dhe ndodhet në gjendje kritike.

Të shtënat ndodhën rreth orës 13:30, pak pasi kishte përfunduar seanca gjyqësore ndaj të akuzuarit Huseyin Akkurt, i cili po gjykohet për vrasjen e Nimanit më 9 mars të vitit të kaluar.

Policia ka arrestuar një nga të dyshuarit për sulmin, ndërsa një tjetër person mbetet ende në kërkim.

Ngjarja ka tensionuar më tej situatën rreth këtij procesi gjyqësor, i cili tashmë po tërheq vëmendje të madhe publike dhe mediatike.