Ndërsa fermerët e Lushnjës i kishin zënë pritë para Kuvendit, ku dolën për të protestuar për buxhetin 2022 për sektorin e bujqësisë, kryeministri Edi Rama nxitoi të bënte show-n e radhës duke i ftuar në takim.
Para Kuvendit, fermerët u kërkuan deputetëve të mos votojnë paketën fiskale të vitit 2022, ndërsa bënë thirrje të konsultohen me ta për ndryshimet e mundshme. Ky ka qenë momenti kur kryeministri Rama sapo zbriti nga makina, dhe kërkoi një takim me disa përfaqësues të tyre.
“Kush janë disa prej përfaqësuesve tuaj, ejani brenda të bisedojmë, se të gjithëve nuk iu takoj dot. Të vijë dhe ai që kishte ngritur dy gishtat”, tha Rama.
Fermerët u ankuan me herët se asnjë prej përfaqësuesve të qeverisë nuk i kishte pritur në takim që të dëgjonte shqetësimet e tyre. Ata thanë se kostot e plehrave dhe farave janë rritur ndjeshëm, gjë që ka vështirësuar aktivitetin e tyre në të paktën katër vitet e fundit.
Për këtë arsye, grupi i interesit ka kërkuar që kjo qeveri të aplikojë gjashtë kërkesa që sipas tyre do të ndikojnë në rimëkëmbjen e bujqësisë shqiptare.
Së pari, ata kërkojnë që subvencionet t’i marrë fermeri, jo më pak se 10 lekë për kilogram, të pasqyruar në faturë tatimore. Së dyti, eksportuesit kërkojnë tre lekë të reja për kilogram, të jepen direkt nga drejtoria e doganave pa procedura burokratike. Kërkesa e tretë lidhet me barazimin e TVSH-së. Pika e katërt parashikon që masa e planifikuar në paketën fiskale për vitin 2022, për të shtuar 10% TVSH-në e imputeve bujqësore, të pezullohet. Së pesti, kërkojnë qeveria të marrë masa për të kontrolluar cilësinë e produkteve bujqësore, dhe të ngrejë laboratore të akredituara të cilat të jenë të aksesueshme nga kush do. Dhe pika e fundit, ata kërkojnë të rregullohen me ligj marrëdhëniet tregtare në sektorin e bujqësisë midis fermerit dhe tregtarëve të cilët nuk paguajnë faturën në kohë.
Discussion about this post