Pasi e ktheu Teatrin në një grumbull rrënojash, tashmë kryebashkiaku Erion Veliaj po kthen planet për “teatrin e ri” në vorbull që thith fondet publike. 180 milionë lekë ka menduar kryebashkiaku të shpenzojë vetëm për mbikëqyrjen e punimeve të teatrit.
Tenderi është publikuar në APP me objekt “Mbikëqyrja e punimeve për objektin Godina e Teatrit Tiranë – Faza 1”. Kompania që do të fitojë tenderin, do të marrë 180 milionë lekë vetëm duke parë si ecin punimet. Dhe do të firmosin kontratën menjëherë pas shpalljes së fituesit (brenda muajit nëntor).
Kontrata do të jetë e vlershme për 2 vjet. Çka do të thotë që punimet për Teatrin do të vazhdojnë deri në vitin 2025. Pra, fondet e caktuara për vitet e ardhshme, kryebashkiaku Veliaj po i shpenzon që tani (para fushatës elektorale).
Ndërkaq, bëhet me dije se fituesi do të shpallet me datë 24 nëntor 2022. Nuk është çudi që fitues të shpallet kompania “Fusha shpk”. Ose ndonjë firmë fantazmë e krijuar prej këtij oktapodi të lidhur me Veliajn dhe Ramën.
Paratë që po përvetësohen
Paratë për mbikëqyrje janë më vete, pasi më herët janë derdhur miliona lekë për punimet e Teatrit. Kujtojmë se në dhjetor të 2019, Erion Veliaj hapi tenderin me vlerë 500 milionë lekë për konsulencë. Ku fituesi ishte paracaktuar firma “Fusha shpk”.
Po për çfarë duhen shpenzuar 500 mln lekë për konsulencë që të bëjë vlerësim, kur ka vetëm një kompani në garë që është “Fusha shpk”.
Të cilën Edi Rama e paracaktoi nëpërmjet kritereve të vendosura. Kriter kryesor pronësinë 40 përqind të truallit privat pranë Teatrit, që e plotësonte vetëm kjo kompani?!
Ndërsa, në vitin 2020, kompania A&E Engineering ka fituar tenderin për projektimin dhe studimin e godinës së re të Teatrit Kombëtar. Shpallja e fituesit u publikua më 5 tetor në Agjensinë e Prokurimeve. Ky tender, me vlerë rreth 500 mijë euro u zhvillua nga Bashkia Tiranë gjatë korrikut.
Shpallen fituese ofertat më të larta
Bashkia Tiranë vlerësoi fituese të tenderit për studim-projektimin e Teatrit Kombëtar ofertën më të lartë që u paraqit në garën me vetëm dy konkurrentë. Oferta e bashkimit të studios shqiptare “A&E Enginnering” dhe asaj italiane “FM Ingegneria SPA” u vlerësua si fituese. Pavarësisht se ajo shfrytëzonte 99.9 për qind të fondit limit të vënë në dispozicion – 60,300,000 lekë nga 60,317,899 lekë që ishte fondi.
Oferta e dytë, e bërë nga bashkimi i studiove shqiptare “Gjeokonsult & CO” dhe “Archispace” kërkonte 55,635,000 lekë dhe ishte të paktën 7.8 për qind më e vogël se fondi limit. Në njoftimin e bërë publik në buletinin e prokurimeve publike, Bashkia Tiranë tregon se e vlerësoi me 96.2 pikë ofertën fituese.
Deri më tani, Veliaj ka shpenzuar 600 milionë lekë për ndërtimin e Teatrit, por gjë konkrete nuk po shohim!
Lexo edhe: Propaganda e Veliajt: 100 milionë lekë për tualetet në shkolla!
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post