Elbasani diti që të bindte një kampion si Bruno Telushi. Edhe pse të shumtë e quanin të vështirë këtë operacion, drejtuesit ia dolën dhe sot që flasim kanë në ekip ishkapitenin e Partizanit.
Në lojë për shërbimet e tij ishte edhe Flamurtari, por verdheblutë i ofruan atë që ndoshta i mungonte 32-vjeçarit.
Besuan tek ai dhe kjo ka ndikuar fort në vendimin e mesfushorit, CV-ja e të cilit është vërtetë e pasur. Këtë e konfirmon enkas për “Panorama Sport” edhe vlonjati. Gjatë intervistës së dhënë për gazetën ai flet për përshtypjet e para në qytet, objektivin, tifozët dhe Kastriotin.
Nga Partizani tek Elbasani, pse zgjodhët që të luani në Kategorinë e Parë?
Në radhë të parë ishin njerëzit që patën besim tek unë dhe kjo gjë më dha kënaqësi, duke filluar nga trajneri apo drejtuesit. Më pas edhe projekti i skuadrës dhe mendimi për Superioren.
Na thoni përshtypjet tuaja të para nga koha që iu bashkuat ekipit?
Të them të drejtën, pa i bërë qejfin askujt, kam mbetur shumë i kënaqur dhe i befasuar nga kushtet, atmosfera apo mënyra se si më kanë pritur në klub. Shokët dhe të gjithë më kanë bërë përshtypje shumë të mira dhe jam shumë i kënaqur.
Elbasani ka vite që pret rikthimin në Superiore, si i shihni shanset këtë sezon?
Është e vërtetë që Elbasani ka vite që pret. Kjo ka bërë që tifozët dhe dashamirësit e futbollit të na mbështesin më shumë dhe të jenë më afër ekipit. Shanset janë të mëdha, klubi ka projekt serioz dhe ka bërë përzgjedhje lojtarësh për Superiore. Jo më kot ka marrë shumë lojtarë nga elita. Kjo tregon seriozitet dhe një objektiv që duhet ta arrijmë me patjetër.
Cilët do të jenë rivalët kryesorë të verdhebluve?
Mendoj se në çdo ekip, ashtu si edhe tek Elbasani, rivalë kemi veten tonë. Në qoftë se ne përshtatemi, japim maksimumin duke luajtur me këmbë në tokë dhe lëmë mënjanë euforinë, mendoj se nuk do të kemi rivalë.
Ndeshja e parë ndaj Kastriotit, si e shihni?
Të gjitha ndeshjet janë të vështira, kanë sikletin e tyre. Ne do të futemi për të dhënë maksimumin në çdo ndeshje. Kastrioti është një ekip i mirë, që ka qenë pjesë e Superiores dhe ka rënë në të Parën, por ne do të shkojmë të japim maksimumin dhe të marrim tri pikët.
Dhe për ta mbyllur, a keni një premtim për tifozët që e presin shumë këtë vit?
Tifozëve u premtoj sa më shumë fitore. U them që të vijnë sa më të shumtë në stadium e të na mbështesin, sepse ky është një plus i madh për ne. Nuk do t’i zhgënjejmë./PanoramaSport
Discussion about this post