Kjo e hënë ka nisur me rënie temperaturash dhe reshje të dendura shiu në të gjithë territorin e vendit, duke sinjalizuar se është herët për të larguar nga garderoba palltot e dimrit.
Kjo, sepse Shqipëria do të jetë e përfshirë nga temperatura tipike dimri, në mjaft raste shoqëruar edhe me shtrëngata e breshër.
Sipas sinoptikanit Hakil Osmani do të kemi edhe ulje të temperaturave me të paktën 5 gradë.
“Gjatë ditës së martë do të kemi një tjetër rënie të ndjeshme të temperaturave të ajrit me të paktën 5 gradë Celsius, duke bërë që temperaturat në orët e para të mëngjesit në zonat malore të regjistrojnë edhe -1 gradë Celsius. Dita e mërkurë do të sjellë sërish rënie të temperaturave të ajrit në -3 gradë Celsius”, tha Osmani për TV Klan.
“Në zonat malore do të rikthehen reshjet e deborës. Priten të jenë prezente në 700 m mbi nivelin e detit, më të fokusuara do të jenë në zonat verilindore dhe shumë më pak në juglindje të Shqipërisë”, shtoi ai.
Kjo javë do të mbyllet me mot të paqëndrueshëm, por me temperatura që do të rriten sërish.
“Priten të rikthehen duke filluar nga dita e premte dhe në vijim, po ashtu edhe pjesa e parë e muajit Prill. Ndërsa në 15-ditëshin e dytë të Prillit, i gjithë vendi do të përfshihet nga temperatura të larta dhe ditë me diell”, nënvizoi sinoptikani.
Discussion about this post