Kryetarit të Bashkisë Librazhd, Mariglen Disha, i ka ardhur në dorë një fond i madh prej 750 milionë lekësh dhe me këtë rast e ka skuqur tenderin me shkelje. Më datë 22 maj 2024, Bashkia Librazhd ka zhvilluar tenderin me objekt ‘Sistemim asfaltim i rrugës së fshatit Librazhd-Katund faza e I-rë , Njësia Administrative Qendër’. Dhe mirë që u bë mbarë bashkia ta bëjë këtë rrugë që gjendet vetëm 20 minuta larg qytetit.
Por duke parë se si është prokuruar ky fond i madh nga Disha, na lindin dyshime që abuzimet do ta cenojnë projektin.
Edhe fondi limit duket që është fryrë. Po ta shohim edhe në hartat që janë publikuar në dokumentet e tenderit tregohet se distanca e rrugës që do të shtrohet me asfalt është vetëm 2370 metra. Por këtu ka diçka tjetër.
Që në objektivin e tenderit theksohet se kjo do të jetë vetëm faza e parë e punimeve, pra do të shtohet së pari, vetëm gjysma e rrugës nga qytetit në zonë e quajtur Librazhd Qendër. Ndërsa për pjesën e mbetur të rrugës, deri në fshatin Librazhd Katund do të zhvillohet një tjetër tender. Pra, problemi i kësaj rruge mbetet i pazgjidhur për banorët dhe do të vazhdojë për një kohë të pacaktuar.
Kjo do të thotë që 750 milionë lekë do të shpenzohen vetëm për t’i hedhur asfalt një copëz rruge 3.5 metra të gjerë, siç tregohet në dokument.
Pra ky është një nga ato tendera ku rruga duket sikur bëhet prej floriri. E po, kryetari i Librazhdit e ka bërë tenderin sipër veten e tij!
Tenderi pa garë
Këtij abuzimi më fondet e bashkisë i shtohen edhe manovrat abuzive që ka përdorur Disha, që kontrata të shkojë në duart e kompanisë së paracaktuar. Në fillim ishin gjashtë firma që kanë dorëzuar dosjet me ofertat deri në afatin e fundit të përcaktuar, por nuk janë marrë në konsideratë.
Komisioni i Dishës i ka anuluar me argumente nga më të ndryshmet, por që përshkruajnë të meta që mund të ishin shmangur me komunikim me operatorët ekonomikë. Një kompanie i mungon lista që vërteton punonjësit e certifikuar, një tjetër nuk ka çuar mostrat e hekurit, apo mungesa të tilla si fotokopje e noterizuar, leje qarkullim mjeti, siguracion apo dokument marrje mjeti me qira. Pretendohet se një kompani tjetër ka bërë ofertë më të ulët se sa e lejon ligji. Por ka një fakt të fortë që i rrëzon justifikimet stafit të Dishës, tre nga kompanitë e skualifikuara kanë oferta më ekonomike se sa firma fituese.
Kështu, “BE-IS” ka propozuar ta kryejë punën me 58.494.657 lekë; “Caushi M” ka ofruar 49,701,516 lekë; “Sireta 2A” ka bërë ofertën 66 666 666 lekë.
Këto janë kritere të vendosura dhe duhen plotësuar, por për gjëra të tilla bashkia duhej të vinte në dijeni operatorët dhe jo t’i përjashtonte ata nga gara, duke eliminuar plotësisht konkurrencën.
Vetëm ofertën e bashkimit të operatorëve 2Z KONSTRUKSION sh.pk – ASI – 2A CO sh.p.k është kualifikuar për në fazën finale. Për të kursyer fondin limit duke të paraqiten oferta sa më të përshtatshme, bashkia duhet ta kishte anuluar tenderin dhe ta përsëriste.
Ndërkohë, Open Data Albania i ka vendosur tenderit “Flamurin e Kuq”, për të treguar riskun e korrupsionit. Gjithsesi vëllezërit Gjikondaj, pronarë të firmës ASI – 2A CO sh.p.k, janë mësuar të përfitojnë nga favorizimi i zyrtarëve në tenderat publikë. Madje sipas KLSH, në disa raste nuk kanë realizuar punimet që kanë marrë përsipër me kontratat e fituara.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post