Disa ditë pasi fitoi tenderin e karburantit pa garë me vlerë 6,5 milionë euro nga Ministria e Bujqësisë, Kastrati fiton përsëri dy tendera pa garë për karburantet me vlerë 721 mijë euro nga Agjencia e Blerjeve të Përqendruara e cila është në varësi të Ministrisë së Brendshme që drejtohet nga Bledi Çuçi.
Agjencia e Blerjeve të Përqendruara ka hapur fond limit me vlerë 1,34 milionë euro për tendera për karburantet të cilat janë ndarë në 5 lote. Për dy lotet e para, në datën 7 prill është shpallur fitues bashkimi i operatorëve “Kastrati” shpk dhe “Kastrati Group” Sh.a pa patur asnjë pjesëmarrës në garë për të disatën herë në prokurimet publike të cilat janë miratuar nga drejtuesi i ABP-së Endrit Mullai.
Loti I me vlerë 562 mijë euro pa TVSH parashikon furnizimin me lëndë djegëse për automjetet diesel (Gazoil) për dy vite. Sipas dokumentave standarte, në kontratë parashikohet një sasi nafte prej 452 mijë litrash e cila do të lëvrohet sipas kërkesave nga Autoriteti Kontraktor që në këtë rast është ABP-ja. Loti II me vlerë 159 mijë euro pa TVSH parashikon furnizimin me lëndë djegëse për automjetet Diesel (Gazoil) për 3 vite. Duke iu referuar të njëjtave dokumentave të lotit I, në lotin II sasia e pritshme është 132 mijë litra të cilat përsëri do të përmbushen sipas kërkesave të ABP-së.
Nga vëzhgimet tona, tek dokumentat e tenderave rezulton se fitimi është i përcaktuar në masën 18 lekë të reja dhe skandali lidhet me faktin se pavarësisht rrethanave ky fitim nuk mund të ndryshohet.
“Gjatë kohës së zbatimit të kontratës, për furnizimin me karburant, vlera absolute e normës së fitimit nuk do të ndryshojë gjatë egzekutimit të kontratës në rast të luhatjes së cmimeve.” -shkruhet tek dokumentat standarte për lotin I dhe lotin II.
Problemi në këtë rast është fakti se nëse tregu i karburanteve pëson rritje të pakontrolluar të çmimit prej mungesave apo luftrave si në rastin e para disa javëve ku çmimi kapi vlerën 280 lekë/ litër ose shkon akoma më shumë sipas skenareve ogurzeza të kryeministrit Edi Rama, përsëri fitimi nuk ndryshon për kompanitë. Pra, kontrata mbron operatorin fitues (Kastratin) dhe lë zbuluar shtetin shqiptar i cili merr një barrë ekonomike të madhe nëse gjërat përkeqësohen. Kryeministri ka thënë se barrën e merr qeveria në rastin e borxheve për OSHEE dhe KESH por barra i ngelet gjithmonë popullit sepse çdo qindarkë e shpërdoruar nga fondet publike dhe çdo borxh që merret shpërndahet mbi taksat që paguajnë qytetarët shqiptar të cilët automatikisht do shkurtojnë shpenzimet e tyre.
Gijotina.com ka denoncuar vazhdimisht tenderat pa garë që i janë dhënë Kastratit të cilat heqin konkurrencën dhe nuk sjellin asnjë përfitim në menaxhimin e të ardhurave buxhetore që janë taksat e shqiptarëve të shpërndara nw fonde publike duke shkelur parimet e tenderimit sepse ka rrezik të lartë për korrupsion sipas Open Data. Sot që flasim bashkia e Durrësit me kryetare Emiriana Sakon ka shpallur fitues Kastratin në një tender pa garë me vlerë 1,3 milionë euro pa TVSH, rast i cili u evidentua nga Gijotina.com pasi nuk kishte asnjë operator tjetër pjesëmarrës si zakonisht. Megjithatë kjo kompani vazhdon të marrë tendera me vlerë të lartë monetare nga pushteti qendror dhe vendor pa patur asnjë filtër përveç zërit akuzues të opozitës shqiptare e cila e etiketon Kastratin si oligarkun kryesor të qeverisë Rama.
Discussion about this post