Luks i shfrenuar nëpër zyra, tashmë jo vetëm në selinë e Bashkisë Tiranë, por edhe tek “Eco Tirana” që e ka qendrën në “Don Bosko”. Kjo shoqëri është themeluar nga Erion Veliaj në bashkëpunim me biznesmenë të lidhur me mafian në Verona, për të pastruar paratë e korrupsionit dhe për të zhvatur arkën e bashkisë.
Nuk mjafton që kjo shoqëri paguan me taksat tona 6 administratorë, por harxhon çdo vit miliona lekë për zyrat e tyre. Dhe pavarësisht denoncimeve në media, “Eco Tirana” vazhdon me shpërfillje të shpërdorojë paratë që u kalon Lali Eri për të pastruar dhe higjienizuar kryeqytetin.
Tenderi me “Flamur të kuq”
Ndërsa, dje denoncuam tenderin 2.5 milionë euro për naftë, ku duken qartë shkeljet e ligjit mbi prokurimet, sot “Eco Tirana” do të ndryshojë mobiliet e zyrës së drejtorit italian që bën pazaret e Veliajt. Sipas radhës, administratorët e kësaj shoqërie janë Renato Guarnieri; Frederico Berto; Andrea Benati; Anjeza Çallpani; Diego Testi; Mirco Caliari.
Për këtë më datë 30 maj 2024, shoqëria ka hapur tenderin 17 milionë lekë me objekt’ Blerje mobilje dhe pajisje për zyra dhe sallën e mensës’. Ishte lënë dy javë kohë për dorëzimin e ofertave dhe shohim që deri më datë 12 qershor kur është mbajtur tenderi ishin dorëzuar 7 oferta. Menjëherë 6 prej kompanive skualifikuar nga gara me argumentin se nuk kishin dorëzuar sigurimin e ofertës apo mostra për produktin. Një tjetër kompani u skualifikua se kishte bërë gabime aritmetike tek oferta, ndërsa firma “Muça” sipas komisionit, kishte ofertë “anomalisht të ulët”.
E vlefshme sipas komisionit ishte vetëm oferta e firmës SHAGA SHPK me vlerë 9.8 milionë lekë. Nëse gjërat qëndrojnë kështu, përse nuk anulohet tenderi dhe të organizohet sërish procedura për të marrë oferta të përshtatshme?
“Eco Tirana” ka shkelur kërkesat e ligjin sepse më datë 28 qershor 2024 ka publikuar kontratën me fituesin në mungesë konkurrence. Theksojmë se Open Data Albania e ka vlerësuar tenderin me “Flamur të kuq” që është shenja e riskut të korrupsionit.
Luks për zyrën e drejtorit
Në fakt, në këtë tender më shumë na shqetëson luksi që blihet me paratë e taksapaguesve. Ku ndryshon zyra e drejtorit të kësaj ndërmarrje nga ajo e Presidentit të Republikës apo e kryeministrit?
Ky drejtor blen një ndejtëse speciale për veten, që quhet “Poltrona drejtuesi rrotulluese” me shpinore të rregjistrueshme me mekanizëm për ulje-ngritje me piston. Tapiceria të jetë në stof cilësor ose lëkure ekologjike
me shtrese te bollshme me mbushje sfungjeri.
Nuk është mjaftuar me kaq! Seti i kolltukëve të zyrës së drejtuesit duhet të jetë i përbërë nga një kolltuk tek dhe dy kolltukë dysh. Veshja e kolltukëve duhet të jetë me lëkurë ekologjike cilësore. Dimensionet duhet të jenë standarde për këtë produkt dhe në përputhje me dimensionet e konfigurimin e zyrës. Tavolinë, dollap, sirtarierë, varëse, gjithçka e re për rehatinë e drejtorit. Një banak recepsioni për sekretaren e drejtorit. Mobilja duhet te jete e hapur nga ana e operatorit për pozicionim e këmbëve. Materiali do të jetë laminant me trashësi jo me të vogël se 2.5 cm me bordurë. Në brendësi, recepsioni do të ketë 3 komodina. Një tavolinë mesi, frigorifer, mikrovalë.
Por ka menduar edhe për varësit. Ja ku u erdhi radha dhe do të blihen 15 karriget rrotulluese për zyrat e tyre. .
“Karriget rrotulluese të kenë shpinore të regjistrueshme me mekanizëm për ulje-ngritje me piston. Karrigia do të mbështetet mbi një bazament në formë ylli prej materiali plastik me 5 rrota në ekstremet e tyre. Rrotat të jenë me material plastik ngarkesë-mbajtës. Krahët mbështetës të karriges të jenë plastikë dhe ngarkesë mbajtës. Tapiceria të jetë në stof të cilësisë së parë ose lëkurë ekologjike”. Me pak fjalë po nuk që me formë ylli, ekologjike, lëkurë dhe e rehatshme nuk e pranon stafi i ndërmarrjes së pastrimit.
Kur pamë në emërtimin e prokurimit që bëhej fjalë edhe për mensën, kujtuam se drejtori i Lali Erit po mendon për punonjësit e pastrimit. Në fakt qenka një mensë e vogël vetëm për drejtorin dhe kabinetin e tij, sepse do të ketë vetëm 3 tavolina.
Lidhjet me mafian italiane
Në qershor të 2016, Kryebashkiaku i Tiranës Erion Veliaj krijoi një kompani të përbashkët mes Bashkisë dhe ndërmarrjes komunale të Bashkisë së Veronës me objekt mbledhjen e plehrave dhe mbetjeve të Tiranës.
Për këtë qëllim, në qershor 2016 u formua kompania EcoTirana, me kapital fillestar një milionë euro, me ortakë 51 për qind Bashkinë Tiranë dhe 49 për qind kompaninë italiane. Kjo e fundit është në pronësi të AGSM dhe AMIA, dy ndërmarrje bashkiake të kontrolluara nga Bashkia e Veronës.
Anëtar i Bordit Administrativ të AGSM Holding dhe president i AMIA-s (një nga dy kompanitë ortake të AGSM-së) është Andrea Miglioranzi, një personazh i njohur i kronikave politike dhe gjyqësore italiane, i emëruar nga Kryebashkiaku Tosi.
Kompania italiane ortake e Bashkinë Tiranë në kompaninë e pastrimit të mbetjeve ‘EcoTirana’, akuzohet nga prokuroria italiane për qarkullim parash në favor të grupit mafioz Ndragheta.
Andrea Miglioranzi, deri më 30 janar 2018 anëtar i Bordit Administrativ i AGSM Holding dhe president i AMIA-s (një nga dy kompanitë ortake të AGSM-së), kompani ortake me EcoTirana-n dhe ish-kryebashkiaku i Veronës Flavio Tosi, i cili firmosi marrëveshjen për krijimin e kompanisë së përbashkët EcoTirana, po hetohen për bashkëpunim me pjestarë të grupit mafioz Ndragheta.
Më 4 qershor 2020, Prokuroria italiane ka gjetur se “kompania komunale e Bashkisë Verona, Amia, është përdorur për të qarkulluar para [të lidhura me organizatën kriminale], dhe dy drejtuesit e saj janë nën hetim”.
Prokuroria ka akuzuar 26 persona ndër to ish-kryebashkiakun Tosi dhe Andrea Miglioranzi për bashkëpunim në organizatë kriminale, mashtrim, pastrim parash, rryshfet, trafik droge, korrupsion, transferim të mirash materiale në shkelje me ligjin.
Tosi po hetohej në gjendje të lirë për përdorimin e kompanisë komunale të Bashkisë Verona Amia, për të likujduar një faturë me vlerë 5000 euro për llogari të një hetuesi privat.
Ndrësa, Andrea Miglioranzi, në arrest shtëpie, akuzohej se ka përdorur kompaninë komunale të Bashkisë së Veronës Amia të pastrimit të mbetjeve, për qarkullimin e parave të organizatës Ndragheta. Gjyqi u mbyll në fillim të këtij viti dhe shpalli fajtor Andrea Miglioranzin.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post