Referuar buletinit të Komisionit të Prokurimit Publik, Bashkia e Tiranës ka rezultuar me numrin më të madh të ankesave për procedurat e prokurimeve në të gjithë vendin. Sipas Buletinit të muajit tetor në Komisionin e Prokurimit Publik, nga 80 ankesa totale në të gjithë Shqipërinë, 54 i takojnë bashkisë së kryeqytetit.
Për ta vërtetuar këtë është fare e thjeshtë. Bashkia e Tiranës me në krye Erion Veliajn, gjatë kohëve të fundit kanë rritur së tepërmi dhënien e tenderëve pa garë duke i kthyer prokurimin publik në monopol të disa kompanive. Gijotina.com ka denoncuar disa herë këto afera, të cilat shkelin ligjet dhe procedurat në mënyrë që taksat e qytetarëve të shkojnë vetëm tek një grusht njerëzish, miq të drejtuesve të Bashkisë.
Kësaj radhe bëhet fjalë për një tender të hapur në datën 4 nëntor, për “përmirësimin e sistemit të çekimit të kartave të aksesit në Bashkinë e Tiranës”. Tenderi me numër reference REF-10305-11-03-2021, ka fondin limit prej 1,229,000 lekë të reja pa TVSH ose rreth 13 milionë lekë të vjetra me TVSH.
Në këtë tender ka marrë pjesë vetëm një kompani, “COMMUNICATION PROGRESS sh.p.k”, e cila është në pronësi të Gentian Likaj dhe Enkeleidi Zoraqi, ku rrjedhimisht është shpallur dhe fituese.
Edhe pse tenderët fitohen me garë mes disa kompanive, kjo nuk paska qenë e përcaktuar për “COMMUNICATION PROGRESS sh.p.k”, e cila ka marrë pjesë e vetme në këtë prokurim duke shtuar dyshimet se ishte e paracaktuar për këtë tender. Gjithashtu nuk ka munguar sinjalizimi nga Open Data e cila ka ndezur flamurin e kuq të shoqëruar me shkrimin “mungesë konkurrence”.
Siç e thamë dhe më sipër, kjo nuk është hera e parë që Veliaj favorizon kompanitë e miqve të tij në tenderët publik, por kjo metodë po përdoret më shpesh kohët e fundit, ndërsa Autoriteti i Konkurrencës ka rënë në një “gjumë letargjik”.
Gijotina.com
Discussion about this post