Ka vite që diskutohet dhe mbi 4 muaj që është hartuar plani i bibliotekës “Të rinjtë për të rinjtë” në Lushnje, por kryetarja Eriselda Sefa u zgjua tani që nisi fushata elektorale. Kryebashkiakja ka firmosur kontratën për të vënë në zbatim projektin “Të rinjtë për të rinjtë”. Që ka në fokus rikonstruksionin e bibliotekës së qytetit. Tenderi është shpallur më datë 29 mars të këtij viti dhe ka si objekt “Rehabilitim Biblioteka “Të rinjtë për të rinjtë”. Sefa ka vënë në dispozicion për këtë projekt 11 674 390,00 lekë (të reja).
Por pse duhen këto para shtesë nga Bashkia?!
Kujtojmë se në prezantimin e këtij projekti në dhjetor 2022, ministrja e Shtetit për Rininë dhe Fëmijët, Bora Muzhaqi, së bashku me drejtorin e përgjithshëm të Agjencisë Kombëtare të Rinisë (AKR), Alqi Kushi, nënshkruan kontratat me disa bashki. Dhe deklaruan se financimi do të bëhet totalisht nga AKR.
Në fakt, në dokumentet e tenderit shihet se 33 milionë lekë do t’i merren taksapaguesve lushnjarë. Këto para për rikonstruktimin bazë që do të bëhet për vitin 2023 dhe më pas investimet plotësuese do të bëhen AKR.
“Burimi i financimit: Buxheti i Bashkisë Lushnje dhe Agjencia Kombëtare e Rinisë (AKR) Vlera e financimit për vitin 2023 nga buxheti i Bashkisë është : 3 341 058 (tre milion e treqind e dyzet e një mijë e pesëdhjetë e tetë) Lekë pa TVSH”, thuhet në dokument.
Me sa duket Muzhaqi na paska gënjyer, ose Sefa ka bashkëpunuar me të për të thithur dhe përvetësuar fondin për fëmijët. Punimet për bibliotekën kush e di kur përfundojnë. Pavarësisht se në tender thuhet se afati është përafërsisht 2 muaj punime.
Tenderi pa garë
Dyshimet për këtë kontratë shtohen e më shumë kur shohim se bashkia ka shkelur ligjin. Dhe shifrat që janë ofruar për këtë shërbim kanë diferencë të madhe. Së pari, kontrata është dhënë pa zhvilluar një garë të mirëfilltë në bazë të ligjit. Sepse për këtë tender kanë paraqitur ofertat e tyre 11 kompani. Por, 10 prej tyre janë skualifikuar automatikisht, duke lënë në garë vetëm firmën “SARDO” shpk, në pronësi të Saba Hamatajt. Ky i fundit pa u lodhur fare ka marrë fitoren në kundërshtim me ligjin. Duke vlerësuar këtë procedurë të parregullt, monitoruesi Open Data e ka listuar tenderin me “Red Flag”
Gjithashtu është shkelur e një pikë tjetër e rregullave për prokurimet.
Sepse firma fituese ka paraqitur ofertën me vlerë 90 milionë lekë, por kishte oferta edhe me vlerë 86 milionë lekë apo 88 milionë lekë. Gjithsesi, ajo që bie në sy është se të gjitha ofertat janë të paktën nga 11 milionë lekë më lirë se fondi limit që ka vendosur të shpenzojë bashkia.
Oferta më e përsëritur është ajo me vlerë 89 milionë lekë. Dhe nëse e marrim si nivel bazë të shpenzimeve reale që do të kryhen i bie që 33 milionë lekë do jepen nga bashkia. Dhe vetëm 56 milionë lekë do të jap AKR. Pra gjithçka u tha në 2022 ishte propaganda e radhës nga ministrja Muzhaqi.
Lexo edhe: Eriselda Sefa blen 750 mln lekë asfalt, rrugët e nisura i ka lënë përgjysmë
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post