Tenderët e karburantit, kur i zhvillon Ministria e Brendshme përmes Agjencisë së Blerjeve të Përqendruara, janë një abuzim i vërtetë. Aty duket hapur vendimmarrja që nuk ka logjikë ekonomike, por kryen porositë e oligarkëve. Konkretisht, supertenderi i saposhpallur i ka kriteret sikur t’i kishte shkruar Shefqet Kastrati me dorën e tij.
Sikur të mos mjaftonte fakti që “Kastrati” dhe një grusht grosistësh e dominojnë tregun e naftës në formë oligopoli, drejtori i Taluant Ballës bën një blerje me “marrëveshje kuadër”.
Jo vetëm kaq! Afati i furnizimit dhe fondi limit llogariten për 3 vjet. Ku e di Balla sa do të jetë çmimi i benzinës pas 3 vjetëve? Ministri po luan me një fond të madh që i është besuar për blerjen e karburanteve të disa institucioneve.
Super tender për të mbushur arkën e Kastratit
Vlera e pritshme e kontratës që prokurohet nga vartësit e Ballës është 399,653,649 (treqind e nëntëdhjetë e nëntë milion e gjashtëqind e pesëdhjetë e tre mijë e gjashtëqind e dyzet e nëntë) Lekë pa TVSH ose 3,643,482 (tre milion e gjashtëqind e dyzet e tre mijë e katërqind e tetëdhjetë e dy) Euro që po të shtojmë TVSH bëhet rreth 4.4 milionë Euro. Kursi i këmbimit sipas Bankës së Shqipërisë datë 31.05.2023 është llogaritur 109.69 lekë.
Tenderi është mbi kufirin e lartë monetar dhe do të duhej të bëhej “ndërkombëtar”, por në mënyrë të qëllimshme ndahet në lote dhe ndiqet procedura “marrëveshje kuadër”.
Loti I është “Furnizim me lëndë djegëse për automjete Diesel (Gazoil)”, me afat të marrëveshjes kuadër 2 (dy) vite;
Loti II, “Furnizim me lëndë djegëse për automjete Diesel (Gazoil)”, me afat të marrëveshjes kuadër 12
(dymbëdhjetë) muaj; Loti III, “Furnizim me lëndë djegëse për automjete Diesel (Gazoil)”, me afat të marrëveshjes kuadër 3 (tre) vite; Loti IV. “Furnizim me lëndë djegëse për automjete Benzine pa plumb, me afat të marrëveshjes kuadër 2 (dy) vite”; Loti V. “Furnizim me lëndë djegëse për automjete Benzine pa plumb, me afat të marrëveshjes kuadër 3 (tre) vite”.
“Kriteret” e Ballës që i rrinë për shtati Kastratit
Duke ndjekur informacionet e Agjencisë së Prokurimeve, mësojmë se përfituesi kryesor (ndoshta i vetmi) i “marrëveshjes kuadër” me Ballën është oligarku “Kastrati”. Ai ka marrë menjëherë pjesën e luanit: Fjala është për Lotin V, “Furnizim me lëndë djegëse për automjete Benzine pa plumb”, me afat të marrëveshjes kuadër 3 vite”, me fond limit: 31,881,870 (tridhjetë e një milion e tetëqind e tetëdhjetë e një mijë e tetëqind e shtatëdhjetë) lekë (pa TVSH) ose 290,654 (dyqind e
nëntëdhjetë mijë e gjashtëqind e pesëdhjetë e katër ) Euro pa TVSH.
Një nga kriteret është përjashtimi i krahasimit të çmimeve, që do të thotë se Kastrati vetë vendos dhe e vulos këtë marrëveshje.
Në rastin e marrëveshjes kuadër, kur do të përdoret kriteri i vlerësimit të çmimit për njësi, për qëllime krahasimi, vlerësimi i ofertave të paraqitura duhet bërë në bazë të shumatores së çmimeve për njësi. Kjo metodë vlerësimi nuk do të përdoret nga autoritetet. Në këtë rast, çmimi i ulët do të vlerësohet me vlerën totale më të ulët të ofruar.
Duke marrë pjesë në procedurë vetëm dy kompanitë e tij “KASTRATI” SHPK dhe “KASTRATI” GROUP, oligarku ia ka shitur benzinën qeverisë me çmim që e kapërcen tregun: 176 lekë (pa TVSH), ose 201 lekë (me TVSH).
Vlerësimi i ofertës u bë më 24 korrik 2023 dhe u bë publik ditën sotme. Oferta e paraqitur, që ka vlerë totale prej 31,881,870 (tridhjetë e një milion e tetëqind e tetëdhjetë e
një mijë e tetëqind e shtatëdhjetë) lekë pa TVSH është identifikuar si fituese e procedurës së prokurimit.
Theksojmë se oferta është sa 100% e fondit limit! Më mirë të mos kishin bërë tender dhe t’i telefonin Kastratit që t’u çonte ca benzinë nga ajo më e shtrenjta!
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post