Drejtoria e Përgjithshme e Transportit Rrugor ka finalizuar një nga tenderët më të rëndësishëm të saj, atë të blerjes së targave. Fitues i procedurës së majme u shpall firma I.D.K, në pronësi të z. Barjam Dalipaj. Kjo firmë ka pësuar rritje në fitimet e lejeve dhe tenderëve në vitet e fundit, teksa ka pasur edhe dyshime se favorizohet nga mazhoranca.
Pronari i firmës (Barjam Dalipaj) është babai i Administratorit të Operatorit të Sistemit të Shpërndarjes, Blendian Dalipaj. A ka influencuar djali që babai të merrte tenderin me vlerë 6.5 milionë euro?!
Dyshimet janë të mëdha, pasi oferta e firmës I.D.K është plot 750 mijë euro më e lartë sesa oferta e firmës që ofroi më pak. Arsyetimi i skualifikimit të atyre që ofruan më pak është se firma sllovene nuk solli me vulë apostile se çfarë tenderësh kishte fituar në atë vend, megjithëse DPSHTRR-ja kishte informacionet e plota se tenderët ishin me 30 milionë euro.
Kjo procedurë është një nga rastet në flagrante të shpërdorimit të buxhetit të shtetit. Nga njëra anë trumbetohet me të madhe se “tenderi është ndërkombëtar” dhe nga ana tjetër pikërisht këta ndërkombëtare skualifikohen me arsye banale dhe mjaft burokratike. Letrat e bëra në zyrat e shtetit duket se janë të paracaktuara, te ata që kanë fituar më para dhe që kanë lidhje të forta me mazhorancën.
Sipas dokumenteve që disponon VoxNews, në datën 29 gusht 2025, larg vëmendjes së opinionit publik dhe disa ditë para rifillimit të punës në administratë, drejtori i Transportit Rrugor Endri Haxhiu ka firmosur tenderin e majmë. Bëhet fjalë për tenderin me objekt “blerje targa prokat dhe shirita”, për një periudhë 3 vjeçare. Në dokumente janë edhe sasitë që kërkohen, ku kërkohen qindra mijëra targa për 36 muaj. Firma fituese, pasi të shpallej, kishte 90 ditë kohë që t’ia servirte DPSHTRR-së.
Oferta e firmës fituese, “I.D.K–KONSTRUKSION” ishte me një vlerë prej 648.429.000 lekë, ose mbi 6.5 milionë euro. Oferta më e ulët ishte e bashkimit të operatorëve “G.S.G” nga Shqipëria dhe “KIG” nga Sllovenia. Këto firma ofruan 574.473.810 lekë, ose rreth 750 mijë euro më pak sesa firma fituese.
Në tender mori pjesë edhe BOE “TSR” & “EHA Hoffman International” me vlerë 688 milionë lekë si dhe “GENERAL TRADING” me ofertë 702 miionë. Emrin e kishte edhe firma “ALGRAFIKA”, por ofroi 0 lekë.
Në dokumentin e shpalljes së fituesit, Haxhiu dhe vartësit e tij shkruajnë se oferta e firmave “G.S.G” e “KIG”, u skualifikua për shkak se dokumenti i Ministrisë së Infrastrukturës së Sllovenisë nuk ka mbërritur sipas procedurave. Kjo ministri i ka lëshuar firmës një vërtetim se firma KIG ka fituar në atë vend dy tendera me vlerë 22 dhe 30 milionë euro. Por, për mjeshtrit e DPSHTRR-së, “vërtetimet nuk janë të legalizuara me vulë apostile”.
Firma këmbënguli që kjo drejtori ti verifikonte dhe, nëse shpalleshin fitues, do t’ia paraqiste me vulë apostile. Më tej, DPSHTRR-ja ka shkruar disa paragrafë se Shqipëria dhe Sllovenia kanë nënshkruar onventa dhe traktate për këto vula dhe si rrjedhojë dokumentet nuk u pranuan!
Firmat që ofruan më pak paraqitën edhe dokumente se kanë fituar tender edhe në Kosovë, por sërish nuk e plotësuan “kapacitetet teknike” të Drejtorisë së Transportit Rrugor në Shqipëri, pasi s’ishte dorëzuar një vërtetim i lëshuar nga Ministria e Punëve të Brendshme të Kosovës. Në Kosovë firmat kanë fituar dy tender me vlerë 2.5 milionë euro.
Por, pavarësisht se firmat prodhojnë targa në Kosovë dhe në një vend të Bashkimit Europian, sërish për specialistët shqiptare nuk janë të mjaftueshme. Aq sa firmosin që tenderin t’ia japin familjes së një drejtori të rëndësishëm të mazhorancës. Të ketë qenë i paracaktuar?!
/Vox News/
Discussion about this post