Denoncohet në Komisionin e Prokurimit Publik një nga tenderët e Drejtorisë së Shërbimeve Rrugore me drejtor Blendi Gonxhen. Kompania që ankohet njofton se janë futur në tender kritere që nuk kanë lidhje me objektin, me qëllim që të skualifikohen operatorët e padëshiruar.
Më konkretisht, bëhet fjalë për tenderin me vlerë 3.479.117 lekë pa TVSH ose 34 milionë lekë të vjetra për “Shërbim dhe mirëmbajtje e automjeteve”. DPSHTRR është denoncuar nga një kompani e skualifikuara nga gara pa të drejtë. Firma ka denoncuar rastin pranë KPP duke pretenduar se argumentet për largimin nga gara nuk janë në përputhje me ligjin.
Në dokumentin e siguruar nga Gijotina.com., një nga shkeljet që ka nxjerrë pa të drejtë nga lista e konkurrimit firmën në fjalë është kërkesa e paraqitur nga Operatori ekonomik në lidhje me certifikatën ISO TS 16949:200. Sipas kompanisë që ka denoncuar shkeljen, “kjo kërkesë është diskriminuese, nuk është në përputhje me objektin e prokurimit dhe pengon pjesëmarrjen në mënyrë të lirë të OE në këtë procedurë prokurimi”. Për më tepër, kjo certifikatë lidhet me industrinë e prodhimit të automobilëve(!)
Nga ana tjetër, verifikimi i kompanisë që ka denoncuar rastin, ka konstatuar se kjo certifikatë në vetvete është me statusin “WITHDRAWN” , domethënë “E TËRHEQUR”, pra nuk ekziston më një certifikatë e tillë. Po ashtu kërkesa e vendosur në Kriteret e Veçanta të Kualifıkimit nga ana e komisionit, sa i përket kërkesës për cilësisë së pjesëve të këmbimit apo të shërbimit, kompania e ka përmbushur më së miri dhe 100%. Ky nuk është tenderi i parë i denoncuar në adresë të drejtorit Blendi Gonxhe. A do të rrëzohet edhe ky tender, si ai i maskave, para disa muajve, me vlerë 150 mijë euro? Çështja është në shqyrtim e sipër nga Komisioni i Prokurimit.
Discussion about this post