Ermal Dredha ia gjen vendin çdo qindarke të arkës së bashkisë Vlorë. Në fund të fundit, tenderat për këtë punë janë! Këtë radhë, kryetari i bashkisë Vlorë, Ermal Dredha po blen aq shumë hekur për varrezat e qytetit, sa duket sikur do ndërtojë ndonjë kullë. Bëhet fjalë për 14 800 kg hekur. Sa lekë kushton hekuri? Çmimi është i ngatërruar, sepse në tenderin për blerje malli është futur edhe puna e transportit të materialeve të ndërtimit.
Janë rreth 20 milionë lekë bashkë me TVSH, që prokurohen nga Drejtoria e Shërbimeve Publike Vlorë. Bëhet fjalë për tenderin me objekt ‘Blerje Hekur, Sektori i Varrezave’. Nuk përcaktohet se për cilat varreza do përdoret kjo sasi hekuri, por lihet të kuptohet se do të përdoret çdo muaj sipas një grafiku furnizimi.
Nga 4 oferta që janë dorëzuar për këtë garë, në fazën finale Komisioni i Dredhës kaloi vetëm propozimin e firmës “M U R A T I” edhe pse ishte më i shtrenjti. Dy ofertat më të lira të “EN – BJO” shpk me 10 milionë lekë dhe “APIS CONSTRUCTION” shpk me vlerë 12 milionë lekë u skualifikuan. Sipas formularit të shpalljes së fituesit, kompanitë e tjera nuk kanë paraqitur zërin e plotë të listës së çmimeve. Një kompanie tjetër i thanë se nuk kishte bërë furnizime të ngjashme.
Me pak fjalë i është shtruar rruga ofertës më të shtrenjtë. “M U R A T I” fitoi tenderin pa garë fare. Kështu, ato lekë që mund të kurseheshin firuan nëpër procedurat e tenderit të Dredhës.
Open Data Albania e vlerëson këtë prokurim me “Flamur të kuq”, që tregon riskun e korrupsionit. Firma fituese me bazë në Bulqizë, në pronësi të Imer Muratit vitet e fundit ka përfituar rreth 50 kontrata të tilla publike, ku në pjesën dërrmuese është favorizuar përmes tenderave pa garë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post