A ka nevojë Bashkia e Tiranës, për marrje makinash pune e zyre me qira? Erion Veliaj alias Lali Eri nuk pyet njeri! Kjo del edhe nga këqyrja e dokumenteve të tenderit 3.4 milionë euro për “Marrje Mjetesh Rrugore me Qera Operacionale
(leasing) për Policinë Bashkiake, Njësitë Administrative, MZSH dhe aparatin e Bashkisë Tiranë”. Nuk ka asnjë argumentim ekonomik apo mbështetje në vendimet e këshillit bashkiak për këtë shpenzim marramendës. Për më tepër tenderi është fiktiv pasi njëra kompani ka paraqitur ofertë zero lekë, ndërsa pjesëmarrësja tjetër e ka denoncuar procedurën në Komisionin e prokurimit publik.
Koncesioni i pashpallur
Ky është një koncesion i pashpallur sepse kontrata e shërbimit është 3-vjeçare dhe shfrytëzon paratë e buxhetit afatmesëm deri në 2027. Tenderi i hapur më 22 dhjetor 2023, në mjegullën e fishekzjarrëve të festave të fundvitit ka vetëm një qëllim: kreditimin e fondit në llogarinë e një biznesmeni të paracaktuar për koncesionin e pashpallur.
Tenderi ndahet në tre pjesë, ku Loti 1 është “Marrje Mjetesh Rrugore me Qera Operacionale (leasing), autoveturë elektrik”, Loti 2 : “Marrje Mjetesh Rrugore me Qera Operacionale (leasing), Kamionçinë Pick UP”; Loti 3: “Marrje Mjetesh Rrugore me Qera Operacionale (leasing), Mikrobuz”.
Fondi limit është 353.977.200 lekë (pa TVSH) ose 3,412,157.3 Euro (pa TVSH) i ndarë në lote si më poshtë:
Loti 1 ka në dispozicion 2,432,281.4 Euro (pa TVSH); Loti 2 ka 811,641.5 Euro dhe Loti 3 ka 168,232.5 Euro (pa TVSH).
Një makinë me qira, 35 mijë euro
Sipas dokumenteve të tenderit, bashkia Tiranë nga Loti 1 merr shërbimin qiradhënie për 70 makina elektrike, ku me një llogari të thjeshtë i bie që secila të paguhet 35 mijë euro. Me kaq lekë blihet në treg një autoveturë elektrike me të gjitha opsionet.
Nga ana tjetër, bashkia Tiranë nuk ka nevojë për makina me qira. Policia bashkiake sapo i ka blerë dhe bojatisur makinat e reja, ndërsa aparati i bashkisë i ka makinat luksoze. Të paktën, duke e ditur që do të merren këto makina elektrike, të anulohen tenderat e bërë këtë vit për karburant!
Ndërkohë Loti 2 parashikon marrjen me qira të 20 kamionçinave dhe Loti 3 parashikon marrjen e 5 mikrobuzëve.
Kujt ia jep Lali Eri këto para?
Më 29 shkurt 2024, Lali Eri ka shpallur fituesin e Lotit 1 që është Tirana Auto” sh.p.k me pronar Gert Gjelin. Në këtë procedurë prokurimi kanë marrë pjesë tri kompani, ku njëra prej tyre “PORSCHE ALBANIA SH.P.K ka dhënë ofertën zero lekë.
Ndërkohë, tenderi ka mbetur pezull pasi është denoncuar në KPP nga kompania pjesëmarrëse në procedurë “ALBANIA CAR RENTALS” SH.P.K.
Ajo kundërshton kualifikimin e kompanisë fituese sepse, sipas saj, firma nuk përmbush kriteret, madje nuk ka dorëzuar në tender dokumentet e autorizimit nga prodhuesi. Po ashtu, sipas “ALBANIA CAR RENTALS” SH.P.K, nga fituesi nuk është paraqitur në komisionin e tenderit as katalogu teknik i mjeteve.
Kujtojmë se Erion Veliaj e ka krijuar precedentin e makinave me qira me kontratën 4- vjeçare që lidhi me biznesmenin Agron Papuli më 2019, të cilit i dha 1.7 miliard lekë për të përdorur 20 makina.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post