Tenderi korruptiv 500 mln i fituar nga “4-AM”, varësit e Rexhë Byberit pranojnë fajësinë

Tre vartës së kryebashkiakut të Tropojës, Rexhë Byberi kanë pranuar akuzat e ngritura nga SPAK për shkelje të barazisë në tendera në një procedurë prokurimi të fituar nga kompania “4-AM”.

SPAK njoftoi këtë të hënë se ka mbyllur hetimet dhe ka dërguar në gjykatë kërkesën me marrëveshje për pranimin e fajësisë për 3 të pandehur që akuzohen për shkelje të barazisë në tendera për terrenet sportive dhe sistemimin e jashtëm të gjimnazit “Asim Vokshi” në Tropojë.

Akuzat

Sipas SPAK, Zenel Çela, Ramiz Bardhi dhe Rexhep Ismajl Isufaj, si anëtarë të Komisionit të Vlerësimit të Ofertave, nuk kanë trajtuar në mënyrë të barabartë operatorët ekonomikë pjesëmarrës në procedurën e prokurimit me objekt “Shkolla Asim Vokshi”, Bashkia Tropojë.

Procedimi penal numër 288, i vitit 2021, është regjistruar mbi bazën e materialit kallëzues të referuar nga Kontrolli i Lartë i Shtetit. Objekt i hetimit të këtij procedimi penal ka qenë procedura e ndjekur nga autoriteti kontraktor Bashkia Tropojë, në prokurimin publik me objekt “Shkolla Asim Vokshi-Palestër dhe terrene sportive dhe sistemime të jashtme në gjimnazin Asim Vokshi”, me fond limit 50.319.591 lekë, pa Tvsh – lloji i procedurës e hapur.

Megjithëse Bashkimi i Operatorëve Ekonomikë “Halili 1 & Shendelli”, ka paraqitur ofertën më të ulët në vlerën 42.072.833 lekë, pa Tvsh, sqaron SPAK, të pandehuri kanë shpallur fitues operatorin ekonomik “4 A-M”, me ofertën 50.269.533 lekë pa Tvsh, duke shkaktuar një dëm ekonomik në vlerën 8.196.700 lekë (si diferencë midis dy ofertave).

Fituesi

Referuar të dhënave në Agjencinë e Prokurimit Publik, tenderi në të cilin sipas SPAK është favorizuar “4 A-M”, është hapur më 23 Prill 2019 dhe është mbyllur dy muaj më vonë.

Të dhënave në formularin e fituesit ngrenë menjëherë dyshimet se skema e përdorur për të kanalizuar milionat te “4 A-M” është kryekëput korruptive.

Firma e shpallur fituese që ka arkëtuar mbi 500 milionë lekë (të vjetra) ka arritur të dalë fituese në një garë ku pjesëmarrëse kanë qenë plotë 9 kompani.

Që “4 A-M” të shpalljeje fituese janë s’kualifikuar të gjithë operatorët e tjerë. E mbetur e vetme, edhe pse me ofertën më të lartë nga gjithë garuesit e tjerë, “4 A-M” siguroi kontratën me Bashkinë e Tropojës.

Të dhënat e APP-së tregojnë se një nga operatorët me ofertë më të ulët ka bërë ankim, megjithatë verdikti final nuk ka ndryshuar.

“4 A-M”, sipas të dhënave në Qendrën Kombëtare të Biznesit, rezulton në pronësi të Ardit Metajt, megjithatë raportime të shumta mediadike kanë sugjeruar se ai është një person fasadë pas së cilit fshihet oligarku Bashkim Ulaj.

“4 A-M”, gjatë qeverisjes së zgjatur Rama, njihet për tenderat e majmë fituar nga pushteti qendror dhe lokal. Një prej entet që kanë kanalizuar para publike te kjo kompani është edhe Bashkia e Tropojës e drejtuar nga Rexhë Byberi, i kallëzuar në SPAK në fund të muajit Janar.

Disa javë më parë, Gijotina ka raportuar se si “4 A-M” ka zvarritur punimet në ndërtimin e ujësjellësit të fshatit Dragobi, në një procedurë prokurimi që firma ka fituar po nga Bashkia e Tropojës.

Rexhë Byberi i pafajshëm

Në lidhje me këtë procedurë tenderimi, Prokuroria e Posaçme vjen me një përfundim të ngjashëm me drejtuesin e autoritetit tenderues, si në rastin e Erion Veliaj për dosjen e njohur si “5 D”.

Për shefin e të akuzuarve, kryebashkiakun e Tropojës Rexhë Byberi, SPAK nuk ka gjetur përgjegjësi penale në lidhje me këtë rast.

Edhe pse enti që ka dhënë tenderi është Bashkia Tropjë e drejtuar nga Byberi, hetimet e SPAK, e kanë vendosur në një pozicion me kryebashkiakun e Tiranës Erion Veliaj në dosjen “5 D”: Ai nuk ka pasur dijeni për zullumet e vartësve.

Lexo edhe:

Rexhe Byberi avullon 4 MLD lekë, rrugët e Tropojës mbeten pa asfalt