I vetmi ilaç për babëzinë e kryetares së Bashkisë Durrës, Emiriana Sako, qenkan tenderët! Ajo blen çdo vit miliona lekë kosha mbeturinash dhe sërish Durrësi është i mbuluar nga plehra, sidomos gjatë stinës së verës. Paratë ikin në kosha dhe organet e auditimit apo hetimit mbyllin sytë. Këtë herë do të raportojmë tenderin me objekt “Blerje kazanë për mbetje urbane” me fond limit 300 milionë lekë.
Gara u hap në shkurt të këtij viti, por më datë 19 maj 2023 është depozituar ankesa në Komisionin e Prokurimeve Publike nga firma “POWER INDUSTRIES”. Për të mbajtur të fshehtë shkeljet që ka bërë Sako në këtë tender, duke qenë se abuzimet janë të shumta, KPP nuk e ka publikuar dokumentin e ankesës deri në këtë moment.
Madje shohim që këtë çështje e kanë kaluar në mënyrë të turbullt, duke i mbyllur gojën denoncuesit. Tashmë, pas 3 muajsh, Sako e ka mbyllur tenderin dhe ia ka dhënë pikërisht firmës që e denoncoi “POWER INDUSTRIES”. Në dokumente shohim që kontrata i është dhënë në tavolinë, sepse është firmosur pa garë.
Në fakt, janë paraqitur oferta nga 4 firma, madje dy prej tyre kishin oferta më të lira se fituesi, por Sako duhej t’ia bënte dhuratë Andi Markut, që ai të mos vazhdonte më zhurmat lart e poshtë. Dhe kështu ka ndodhur, kjo çështje është mbyllur në KPP dhe Sako është lehtësuar në vendimmarrjen e saj. Ndërsa Marku fitoi 300 milionë lekë pa konkurrencë, sigurisht që brenda është edhe çmimi i abuzimit me fondin e prokuruar nga zyrtarët.
Fituesi
“POËER INDUSTRIES” sh.p.k është një emër i njohur në vorbullën e madhe të aferave. Kjo kompani administrohet aktualisht nga Andi Marku, por themeluesit e mëparshëm janë Olta Xhaferi dhe Maksim Shena. Kompania është e njohur për përfshirjen në skandalin, kur Rama i xhiroi kësaj firme 35 mijë dollarë për gomat e makinës së tij të blinduar.
Po flasim për tenderin me objekt “Riparim i automjetit blind” i zhvilluar nga Drejtoria e Shërbimeve Qeveritare, një strukturë kjo që kujdeset edhe për rehatinë dhe luksin e kryeministrit. Pjesa më e madhe e parave u investuan tek gomat e makinës së blinduar, të cilat duhet të ishin të cilësisë më të lartë, duke ofruar siguri maksimale për Ramën.
Në garë për riparimin e makinës së blinduar qeveritare kanë marrë pjesë Bushi-Servis, Alstezo dhe Kadiu, të cilat kanë paraqitur oferta më të ulëta. Por, fituese u shpall “Power Industries”, me ofertën më të lartë.
Duhet të theksojmë këtu se edhe në viti 2022, Marku mori 288 milionë nga Sako për kosha, por se çfarë ndodhi me ato para askush nuk jep llogari.
Lexo edhe: Veliaj dhe Sako çuan 31 MLN € për plehrat në 2022, rritën transfertat për inceneratorin
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post