Tensione dhe kaos në kampin e MEK/ Çfarë ndodhi në kampin e muxhahedinëve në Manëz

Një situatë kaosi është krijuar ne kampin e MEK në Manëz, atje ku janë strehuar disa mijëra persona të konsideruar si pjesë e opozitës iraniane. Gjithçka nisi me një operacion policor, që në dukje u konsiderua si rutinë në kampin MEK në zbatim të vendimit të Gjykatës.  Disa qindra forca policore, nga të gjitha repartet speciale, por edhe anti-terrori, kanë marrë pjesë në operacion, ndërsa te dhënat janë kontradiktore.  Sipas muxhahedinëve, të paktën 20 anëtarë të MEK janë plagosur si pasojë e përplasjes me policinë, ndërkohë që raportohet edhe për 1 viktimë.

Zyrtarisht policia nuk ka dhënë asnjë informacion zyrtar, por nga informacionet jozyrtare mësohet se disa policë kanë mbetur të lënduar.  Viktimën në kampin e MEK e konfirmon edhe avokati Genc Gjokutaj, ndërsa banorë të kampit flasin për dy viktima. Nga raportimet mësohet se policia ka mundur të marrë disa prej kompjuterëve që zotëroheshin nga pjesëtarë të muxhahedinëve, me dyshimet se ishin përdorur ose do të përdoreshin në sulme kibernetike.  Pjesëtarë të kampit akuzojnë policinë për dhunën e ushtruar, sipas tyre, pa arsye.

“Policia ka thyer derën, ne i hapëm vetë dyert më pas. Miku im më i ngushtë mbeti i vrarë. Ne na kanë sulmuar kur ishim në kampin e Irakut, prisnim që në Shqipëri të ishim të sigurtë”, tha një nga pjesëtarët e MEK. Ajo pohoi se ne nuk kemi as armë dhe asgjë tjetër të paligjshme.  Pas më shumë se 4 orësh përplasjesh, policia është tërhequr në ambientet e jashtme të kampit, ndërsa nuk dihet nëse do të ketë një tjetër tentativë për vijimin e operacionit. Referuar të dhënave, policia ka përdorur gazin lotsjellës, që ka shkaktuar edhe dëmtimet më të mëdha te personat e lënduar. Gjithashtu dyshohet se edhe personi që ka humbur jetën dyshohet të jetë asfiksuar nga gazi.

Në një deklaratë, Ministria e Brendshme, mohon që të ketë pasur humbje jete dhe të plagosur, ndersa akuzon MEK se ka shkelur marrëveshjen dhe angazhimet e marra që prej vitit 2014. Ministria e Brendshme akuzon MEK se ka shkelur marrëveshjen, e cila parashikonte strehimin e muxhahedinëve vetëm për qëllime humanitare./Gijotina.com

Lexo edhe:

Tensionet në Manëz, Ministria e Brendshme: MEK nuk iu përmbajt marrëveshjes, nuk ka pasur humbje jete dhe as të lënduar

Lexo edhe:

Situatë e tensionuar në Manëz/ Dyshohen për efektivë të plagosur