Tensione në Kuvend, Garda nuk lejon asnjë deputet të opozitës

Garda e Republikës është vendisur “gardh” tek dera e Parlamentit dhe nuk ka lejuar deputetët e opozitës të futen brenda.

“Hapni derën, lejoni të futen brenda ata që nuk janë të përjashtuar”, thonë deputetët.

Hapeni derën të kaloj sepse nuk jam i përjashtuar”, i drejtohet Saimir Korreshi.

Ndërsa të tjerët dëgjohen duke thënë: “Republikë private e Lindës është kjo”, “Ec, hapu”, “E keni kthyer në burg”.

Teksa pritet të nisë seanca plenare e ditës së sotme, ish-kryeministri Sali Berisha deklaroi nga jashtë Kuvendit se nuk po lejohen që të futen në sallë të gjithë deputetët e opozitës, madje edhe ata që nuk janë të përjashtuar.

“Asnjë deputet i opozitës nuk po lejohet të futet në Parlament. Është marrë Kuvendi nga Garda e Kuqe. Ky është rast që nuk ka ndodhur kurrë. Janë disa deputetë që nuk i takon të futen, por janë shumica që duhet të jenë në seancë. Sot kanë zgjedhur që me urdhër të Ramës, të bllokojnë çdo deputetë të opozitës së vërtetë në Kuvend. Ja ku janë, shihini, filmoni. Ata do të futen nga pas. Imagjinoi se çfarë parlamenti është ky!”, tha ai.

Momentet janë shoqëruar me tensione mes deputetëve dhe punonjëve të gardës, ku ka pasur edhe përplasje fizike mes tyre.

7 deputetë të opozitës janë përjashtuar nga Komisariati i Etikës pas kaosit në seancën e miratimit të Buxhetit 2024.

Më kërkesë të mazhorancës, janë përjashtuar deputetët Ervin Salianji, Lefter Gështnja, Bledion Nallbati, Asllan Dogjani, Isuf Çelaj, Luan Baçi dhe Xhelal Mziu.