Tensione të shumta janë shënuar sot në mbledhjen e Kryesisë së PD, ku pas një konflikti me fjalë, situata mes Jemin Gjanës dhe Aldo Bumçit ka degjeneruar pothuajse në konfrontim fizik.
Burime bëjnë me dije se Gjana është shprehur në mbledhje se personat që i janë bashkuar Foltores së Berishës janë milionerë, dhe ai ende dhe sot e kësaj dite jeton në një shtëpi që i është dhënë nga enti i banesave.
Është dashur ndërhyrja e anëtarëve të Kryesisë që të shmangej konflikti fizik mes Bumçit dhe Gjanës.
“Unë kam akoma shtëpinë që më dhanë te enti i banesave, Berisha dhe ministrat e foltores janë bërë milionerë”, mësohet se është shprehur Gjana gjatë mbledhjes së Kryesisë, që ka nisur prej orës 16:00.
Në dy grupet e krijuara brenda PD-së, Gjana duket se është pozicionuar krah Lulzim Bashës, ndërsa Bumçi prej ditëve të para i është bashkuar Foltores së Sali Berishës.
Në mbledhjen e sotme të Kryesisë nuk kanë munguar as përplasjet mes Lulzim Bashës dhe mbështetësve të Berishës, pas vendimit të kryetarit të PD-së, për të thirrur mbledhjen e Kuvendit Kombëtar në datën 18 Dhjetor.
Discussion about this post