Kryeministri Albin Kurti, mbajti pasdite takimin e Këshillit të Sigurisë së Kosovës, lidhur me situatën e krijuar në veri të vendit dhe incidentet e fundit të shkaktuara nga strukturat ilegale dhe grupet kriminale.
Sipas qeverise kosovare, këto struktura mbështeten dhe koordinohen me Qeverinë e Serbisë kundër Rendit Kushtetues të Republikës së Kosovës.
Në njoftim thuhet se ”strukturat ilegale si dhe grupet kriminale po vazhdojnë të kryejnë akte ekstremiste ndaj qytetarëve të Republikës, institucioneve shtetërore, ndaj pjesëtarëve të Policisë së Kosovës, gazetarëve, ndaj pjesëtarëve misionit të EULEX-it dhe njësive patrulluese të KFOR-it”.
17 ditë bllokadë në veri, por autoritetet në Kosovë pohojnë se Policia i ka të gjitha kapacitetet dhe gatishmërinë për të vepruar, por është në pritje të veprimeve nga KFOR-i.
Qeveria dhe institucionet e Republikës së Kosovës nuk mund të dialogojnë me banda kriminale, teksa theksohet se liria e lëvizjes duhet të rivendoset dhe se nuk duhet të ketë barrikada në asnjë rrugë.
Pas sulmit ndaj një ekipi xhirimi reagoi ambasadori amerikan dhe organizatat e medias duke dënuar aktet e dhunës mbi median, të cilat duhet të jenë në gjendje të punojnë pa kërcënimet e dhunës dhe frikësimit.
Discussion about this post