Ish-kandidatja për kryetare në PD, Edith Harxhi, ka reaguar sot në lidhje me situatën e tensionuar në kufirin Kosovë-Serbi. Përmes një postimi në Facebook ajo i bën thirrje presitentit të Serbisë, Aleksandër Vuçiç, që të qëndrojë larg Kosovës
“Larg duart nga Kosova, Alexandër Vuçiç! Dje dhe sot, përveç djegies dhe dhunimit të disa institucioneve në Zubin Potok, Serbia ka dërguar tanke dhe avionë luftarak në Jarinë.
Burime nga Kosova thonë që mbrëmë helikopterë ushtarak të Serbisë kanë hyrë edhe në territorin e Kosovës”, shkruan ajo.
Ndërkohë Harxhi i ka kërkuar kryeministrit të Kosovës, Albin Kurti, që të veprojë me maturi dhe të mos nxisin tensione, ndërsa serbët, sipas saj, duhet të ndalin provokimet. “Qeveria e Kosovës tashmë duhet të reagojë si qeveri e një shteti të pavarur dhe të ruajë sovranitetin dhe tërësinë territoriale të Kosovës. Nuk është më as 1990-ta, as ‘98-ta dhe as 2004-a. Provokimet Serbe duhet të marrin fund dhe bashkësia ndërkombëtare duhet të kuptojë që Ballkani është në rrezik dhe Serbia nuk ka ndryshuar as pas 20 vjetësh. Kush prek Kosovën ka prekur Shqipërinë”, shkruan ajo.
Situata mes Kosovës dhe Serbisë vazhdon pres disa ditësh në tensione dhe pa zgjidhje.
E.H/ gijotina.com/
