Këshilli Kombëtar i Integrimit ka anuluar mbledhjen e parashikuar për tu zhvilluar mesditën e së hënës, ku i ngarkuari me Punë i Delegacionit të BE Luigi Soreca pritej të prezantonte Progres Raportin e BE për vitin 2023.
Duket se vendosmëria e deputetëve të opozitës për të mos lejuar funksionimin normal të Kuvendit deri në plotësimim e kushteve të tyre për respektimin e të drejtave kushtetuese, ka detyruar Kuvendin të njoftojë anëtarët për anullimin e mbledhjes.
Përmes një emaili zyrtar anëtarët janë njoftuar se mbledhja e planifikuar anulohet.
Këshilli Kombëtar i Integrimit bashkëdrejtohet nga deputetja demokrate Jorida Tabaku dhe deputeti socialist Toni Gogu, si dhe ka në përbërje kryetarët e grupeve parlamemtare, kryetarët dhe nënkryetarët e komisioneve parlamentare.
Nuk dihet ende se kush e ka kërkuar anulimin e kësaj mbledhje, por Ambasadori Soreca nuk do të ketë mundësi të raportojë në Kuvend mbi raportin për Shqipërinë, ku ndër të tjera evidentohej se Komisionet Hetimore janë një drejtë kushtetuese e opozitës dhe se përjashtimi i deputetëve të opozitës është një akt i paprecedent.
Discussion about this post