Janë hequr të gjitha barrikadat në veri të Kosovës. Këtë e ka konfirmuar zëdhënësi i Policisë në rajonin e veriut, Branisllav Radoviç. Në një reagim për REL, ai thotë se aktualisht situata shfaqet e qetë. Më herët, drejtori i Zyrës për Kosovën në Qeverinë e Serbisë, Peter Petkoviç deklaroi në një konferencë për mediat se ishin në prag të shpërthimit të një konflikti serioz.
Ndërkohë, Presidenca e Kosovës pretendon se Serbia ka pasur mbështetje nga ana e Rusisë për të destabilizuar rajonin. Ajo i bën thirrje BE-së që të vendosë sanksione ndaj Aleksandër Vuçiç. Gjatë së dielës në dy pikat kufitare në Jarinjë dhe Bërnjak ka pasur tensione për shkak të vendosjes së reciprocitetit me Serbinë për targat dhe dokumentet e identifikimit.
Nga ana e serbëve ishin vendosur barrikadat në afërsi të këtyre dy pikave. Pas pezullimit për 30 ditë nga ana e Qeverisë së Kosovës të kësaj mase, sot janë larguar barrikadat dhe raportohet situatë më të qetë./ REL/
Discussion about this post