Forcat ushtarake të KFOR-it kanë mbërritur një orë më parë pranë Pikës Kufitare të Jarinjës, ku anëtarët e Njësisë Speciale të Kosovës janë vendosur aty që prej një jave.
Mediat fqinje shkruajnë se janë ushtarë amerikanë, polakë dhe kanadezë brenda misionit të KFOR- it në Kosovë që kanë arritur në veri të kufirit me Serbinë. Nuk dihet nëse mbërritën në Jarinje për të zëvendësuar forcat speciale të Prishtinës, apo nëse kjo do të thotë se policia e blinduar e Kosovës do të tërhiqet.
Kryeministri Albin Kurti tha më herët teksa foli për situatën në veri të Kosovës se bashkë me Ministrin e Punëve të Brendshme kanë diskutuar me komandantin e përgjithshëm të KFOR-it, Federici për situatën e sigurisë. Ai deklaroi se nuk ishte i informuar nëse do të ketë sot ndërhyrje të KFOR në veri.
Në konferencën e përbashkët me Ramën, ai tha se ka komunikuar gjithashtu me sekretarin e përgjithshëm të NATO-s, Stoltenberg dhe përfaqësuesin për politikë të jashtme të Komisionit Europian, Borell.
