Presidenti i Shteteve të Bashkuara të Amerikës, Joe Biden ka rënë dakord “në parim” për të mbajtur një samit me presidentin rus Vladimir Putin për të diskutuar krizën në Ukrainë. Bisedimet e propozuara nga Franca do të zhvillohen vetëm nëse Rusia nuk pushton fqinjin e saj, ka konfirmuar Shtëpia e Bardhë.
Takimi mund të ofrojë një zgjidhje të mundshme diplomatike për një nga krizat më të rënda të sigurisë në Evropë. Zyrtarët amerikanë thonë se inteligjenca sugjeron se Rusia është gati të nisë një operacion ushtarak, të cilin Moska e mohon. Propozimi u njoftua nga presidenca franceze pas dy telefonatave mes presidentit Emmanuel Macron dhe Putin, të cilat vazhduan për gati tre orë në total. Shkëmbimi i dytë ndodhi në orët e para të së hënës me orën e Moskës dhe pasoi një bisedë 15-minutëshe që Macron pati me Biden.
Sipas presidencës franceze, Putin ra dakord për të “përparuar një zgjidhje diplomatike” të krizës. Ai tha se “punë intensive” do të kryhej për të mundësuar një takim “në orët e ardhshme” me synimin për një armëpushim. Kremlini tha se Putin fajësoi ushtrinë ukrainase për përshkallëzimin e tensioneve. Ukraina e ka hedhur poshtë këtë, duke thënë se Moska është e përfshirë në një fushatë provokuese që synon të krijojë një pretekst për një ndërhyrje.
Presidenca franceze tha se të dy liderët ranë dakord për të rifilluar bisedimet përmes Formatit të Normandisë, një grup i krijuar për të zgjidhur konfliktin në Ukrainën lindore që përfshin Rusinë, Ukrainën, Francën dhe Gjermaninë.
Po ashtu, Presidenti i Rusisë Vladimir Putin dhe homologu i tij ukrainas Volodimir Zelenski kanë pranuar të negociojnë si pjesë e Grupit Tripalësh të Kontaktit për të vendosur armëpushim mes dy vendeve.
Kryeministri i Mbretërisë së Bashkuar Boris Johnson tha se zotimet e Putinit ndaj Macron ishin një “shenjë e mirëseardhjes” që ai mund të “angazhohet ende në gjetjen e një zgjidhjeje diplomatike”. Por Johnson i bëri thirrje Putinit të “tërhiqet nga kërcënimet e tij aktuale dhe të tërheqë trupat nga kufiri i Ukrainës”.
Çfarë ka ndodhur?
Dy të vrarë e disa të plagosur është bilanci i deritanishëm pas rritjes së tensioneve mes Ukrainës dhe Rusisë. Frika e nisjes së një lufte të frikshme ka bërë që NATO të tërheq stafin nga Kievi. Jo vetëm NATO por edhe vende të tjera të Evropës dhe botës u kanë kërkuar qytetarëve të tyre që të largohen nga Ukraina, duke parë rritjen e tensioneve. Forcat qeveritare ukrainase dhe rebelët e mbështetur nga Moska kanë akuzuar njëra-tjetrën për bombardime dhe shkelje të tjera të armëpushimit mbrëmjen e djeshme duke lëshuar alarmin për një pushtim rus. Bashkimi Europian i ka kërkuar Rusisë që të tërheqë forcat ushtarake që ka në kufi me Ukrainën dhe që mos të përdorë armë në zonat civile. Vendet perëndimore si SHBA-ja por edhe Anglia kanë paralajmëruar Ukrainën se Rusia pritet të nisë pushtimin shumë shpejt.
Edhe pse Rusia ka njoftuar prej ditësh tërheqje të forcave të armatosura nga kufiri me Ukrainën, Kievi së bashku me NATO-n dhe Perëndimin këmbëngulin se Moska po shton në mënyrë të qëllimshme trupat ruse në kufi. Sipas raporteve në Ukrainë, numri i ushtarëve rusë ka shkuar në 140 mijë në hapësirën kufitare mes dy vendeve. Në Britaninë e Madhe besojnë se Kremlini ka angazhuar 169-190 mijë ushtarë rusë në vijën kufitare Ukrainë-Rusi.
Discussion about this post