Joe Biden ka mbajtur një takim me liderët e Bashkimit Evropian përpara bisedimeve të tensionuara nesër me Vladimir Putinin, pasi situata në kufirin midis Rusisë dhe Ukrainës po bëhet gjithnjë e më serioze. Javën e kaluar, Putin paralajmëroi vendet e NATO-s se do të kalonin një “vijë të kuqe” nëse do të vendosnin trupa në zonën e tensionuar, pasi rreth 94,000 trupa ruse u mobilizuan pranë kufirit. Biden, kryeministri britanik Boris Johnson, presidenti francez Emmanuel Macron, kancelarja gjermane që në ikje, Angela Merkel dhe italiani Mario Draghi, ndanë shqetësimin për mobilizimin e ushtrisë ruse në kufijtë e Ukrainës dhe retorikën gjithnjë e më të ashpër të Rusisë.
“Ajo që po bëj është të bashkoj atë që besoj se do të jetë grupi më gjithëpërfshirës dhe kuptimplotë i iniciativave për ta bërë shumë, shumë të vështirë për Putin që të vazhdojë dhe të bëjë atë që njerëzit janë të shqetësuar se ai mund të bëjë”, u tha Biden gazetarëve duke aluduar kërcënimin e një pushtimi nga Rusia.
Një zëdhënës i Johnson tha se grupi i liderëve perëndimorë theksuan nevojën për të siguruar një front të bashkuar përballë kërcënimeve dhe armiqësisë ruse.
“Udhëheqësit i bënë thirrje Rusisë që të zvogëlojë tensionet dhe të rikonfirmojë mbështetjen për të vendosur integritetin territorial të Ukrainës”, tha zëdhënësi.
Biden dhe Putin do të bisedojnë nesër për këtë çështje, teksa pritet që Biden të paralajmërojë Rusinë të ul tensionet, teksa thekson se diplomacia është forma e duhur për të zgjidhur problemet.
“Objektivi ynë këtu është të përcjellim diplomatikisht se ky është momenti që Rusia të tërhiqet nga forcimi i ushtrisë në kufi, se diplomacia është rruga e duhur përpara”, u tha gazetarëve sot sekretarja e shtypit e Shtëpisë së Bardhë, Jen Psaki.
Putin thuhet se do të bëjë presion për një angazhim të detyrueshëm që Ukraina të mos anëtarësohet në NATO. Sot, zëdhënësi i tij hodhi poshtë frikën për një pushtim rus si “retorikë agresive dhe armiqësore” nga fuqitë perëndimore.
Discussion about this post