Zbardhen dy pistat e hetimit për vrasjen e rojës së serave në Fier Petraq Gjikës mëngjesin e sotëm. Para 4 vitesh, Petraq Gjika, vëllai i kryeplakut të fshatit ishte plagosur me thikë nga një person teksa ishte në një kafe.
Ngjarja asokohe ndodhi në 4 korrik të vitit 2018 në vendin e quajtur “Grecalli”. Gjatë atij episodi Gjika u plagos në bark dhe në fyt, por fatmirësisht arriti t’i mbijetonte plagëve, ndërkohë që për krimin u arrestua një ditë më vonë Xhevat Bregun, banues në Mbrostar, i cili aktualisht po vuan dënimin në burg. Policia aktualisht po heton nëse ngjarja e sotme ka lidhje me plagosjen e 4 viteve më parë.
Ndërkohë që grupi hetimor nuk përjashton mundësinë që Gjika mund të jetë përballur me një tentative grabitje të serës, ndërsa mund të jetë sulmuar për vdekje nga ndonjë hajdut.
Do të jenë pikërisht kamerat e sigurisë së objektit ato që do të hedhin më shumë dritë mbi ngjarjen dhe mund të çojnë në identifikimin e autorit.
Nuk dihen ende motivet e kësaj ngjarjeje. Pritet të merren në pyetje familjarët e viktimës për të zbuluar nëse viktima ka patur konflikte ose mosmarrëveshje me ndonjë person tjetër, që mund të jetë bërë shkak për këtë ngjarje.
Po ashtu policia po heton mbi të shkuarën e 67- vjeçarit Petraq Gjika.
Në vendngjarje ka shkuar grupi hetimor dhe po punohet për zbardhjen e kësaj ngjarje.
Discussion about this post