Policia e Fierit ka dalë me njoftim zyrtar në lidhje me procedimin ndaj naftëtarëve të Ballshit, të cilët u shoqëruan gjatë ditës së djeshme në ambientet e komisariatit pas protestave për rafinerinë.
Mësohet se, janë proceduar penalisht 9 naftëtarë, pasi akuzohen se kanë prishur derën kur kanë tentuar të kalojnë portën e rafinerisë, si dhe kanë kundërshtuar rojet private të vendosur në ruajtje të objektit.
Naftëtarët e Ballshit kanë zhvilluar protesta të vazhdueshme përpara godinës së Uzinës, ku kërkojnë që rafineria të rivihet në funksion dhe të mos shitet për skrap. Ata theksojnë se mbyllja e uzinës do të shpopullonte zonën ku banojnë, pasi rafineria është e vetmja formë punësimi për ta.
Pjesa më e madhe e tyre kanë fituar edhe gjyqin për të marrë rrogat e pa dhëna gjatë viteve, por ende nuk kanë marrë asnjë lekë. Qeveria ka vendosur një rrogë prej 300 mijë lekësh në muaj për të gjithë naftëtarët që nuk arrijnë të gjejnë punë për 3 vitet e ardhshme, por kërkesa e tyre është rifillimi i punës, në vendin ku kanë punuar prej shumë vitesh.
Discussion about this post