Tentuan të kalonin kufirin me dokumenta false, 3 në pranga

Tre persona janë arrestuar në Durrës, pasi kanë tentuar që të kalojnë kufirin me dokumente të falsifikuara.

Mësohet se në pranga kanë rënë dy persona nga Kosova si dhe një 39-vjeçar banues në Turqi.

“Shërbimet e Policisë Kufitare në PKK port Durrës, bazuar në analizën e riskut, kanë kaluar për kontroll më të detajuar, 3 shtetas, për të cilët kishin dyshime se kishin paraqitur dokumente false. Pas verifikimeve rezultoi se dokumentet që kishin paraqitur këta shtetas, për të dalë jashtë Shqipërisë, ishin të falsifikuara. Në përfundim të veprimeve u arrestuan në flagrancë, për veprën penale “Falsifikimi i letërnjoftimeve, i pasaportave ose i vizave”, shtetasit: Sh. H., 37 vjeç, F. H., 23 vjeç, të dy banues në Kosovë dhe M. S., 39 vjeç, banues në Turqi”, njoftoi policia.

“Dokumentet e falsifikuara u sekuestruan në cilësinë e provës materiale. Materialet i kaluan Prokurorisë, për veprime të mëtejshme”, thuhet më tej në njoftim.