Lëkundjet e vazhdueshme dhe frika për aktivizimin e vullkanit Kolumbo, çuan kryeministrin Kyriakos Mitsotakis në Santorini në një kohë kur aktiviteti intensiv sizmik vazhdon të testojë banorët.
Ai vizitoi spitalin e ishullit dhe vendndodhjen ku po qëndrojnë njësitë e emergjencës në çadrat e tyre. Kreu i qeverisë greke shoqërohej nga ministri i Krizave Klimatike dhe Mbrojtjes Civile, Vasilis Kikilias.
Kryeministri në mbledhjen me përfaqësuesit e Santorinit njoftoi një financim fillestar prej 3 milionë eurosh, në mënyrë që të ndërtohet në pjesën jugore të ishullit një portë shpëtimi për “të na mbuluar në çdo skenar”.
Ai thotë se këshillat e komuniteti shkencor janë ato që do të diktojnë vendimet e mëtejshme ndërsa lëkundjet e deri tanishme kanë qenë të tërmeteve mesatare.
“Santorini nuk është i panjohur për fenomenet gjeologjike aktive. Kjo është pikërisht ajo që ne po vëzhgojmë aktualisht, shumë tërmete të përmasave mesatare, që aktualisht nuk paraqesin ndonjë rrezik real apo ndonjë rrezik real për ishullin. Por, detyra ime është të ve-proj gjithmonë me kujdes dhe prandaj kemi rimobilizuar, infrastrukturën shtetërore në rast të një tërmeti më të madh. Ne po dëgjojmë vazhdimisht ekspertët dhe do të marrim vendimet tona bazuar në këshillat e tyre të ekspertëve”, është shprehur Mitsotakis.
Mëngjesin e së premtes ishulli u lëkund nga një tërmet më magnitudë 5.1, Në vështirësinë e parashikimeve dhe vijimin e lëkundjeve, në Greqi është shtuar frika për rizgjimin e vullkanit Kolumbo pranë ishullit.
Në ishull, me vendim të Sekretariatit të Përgjithshëm të Mbrojtjes Civile, është shpallur gjendje e jashtëzakonshme deri më 1 mars, ndërsa që nga mëngjesi i djeshëm, ekipe nga Athina ndodhen në ishull dhe po kryejnë inspektime në ndërtesa. Deri më tani nuk janë raportuar dëme.
Discussion about this post