Një tërmet me magnitudë 3.9 i shkallës Rihter lëkundi Shqipërinë qendrore dhe veri-lindore pak pas orës 16:00 të pasdites së sotme.
Tërmeti kishte si epiqendër zonën malore pranë Klosit, por për shkak të thellësisë së ulët, vetëm dy kilometra, u ndje i fortë edhe në kryeqytet.
Lëkundjet shkaktuan panik te qytetarët për shkak se ende i kanë të freskëta pasojat e tërmetit tragjik të 26 nëntorit 2019, ku humbën jetën 51 persona dhe u shkatërruan qindra godina.
Por si për ironi të fatit, tërmeti i sotëm daton me të njëjtën ditë dhe të njëjtën orë me tërmetin e 21 shtatorit 2019. Nga ky i fundit, qytetarët e Tiranës u tmerruan, pasi pati disa paslëkundje deri në orët e vona të natës. Madje, qindra qytetarë kaluan natën jashtë nga frika për të qëndruar në banesat e tyre.
Tërmeti i shtatorit 2019 shkaktoi dëme të konsiderueshme materiale, ndërkohë që dy muaj më vonë, konkretisht më 26 nëntor, erdhi tërmeti tragjik, pasojat e të cilit i vuajnë edhe sot qindra shqiptarë, që humbën njerëzit e dashur, por edhe pësuan dëme kolosale materiale. Gijotina.com
