Raundi i 3të i Superligës Shqiptare ka rezervuar këtë fundjavë përballjen mes Teutës dhe Dinamos, një takim i cili pritet të dhurojë shumë emocione, me Dinamon që po tregon në çdo ndeshje që e ka merituar kalimin në elitën e futbollit shqiptar.
Edhe vetë trajneri i Teutës shprehet se e ka shumë të qartë se do ta ketë shumë të vështirë këtë takim, pasi kundërshatri ka treguar shumë cilësi.
Në deklaratën e tij për mediat para këtij takimi, trajneri i Teutës, Edi Martini shprehet:
“Po, jemi gati për ndeshjen me Dinamon. Ekipi ka një gjendje të mirë, me përjashtim të Plakut, i cili ka pasur probleme, por do ta shohim deri pak orë para takimit nëse do të jetë pjesë e ekipit apo jo. Normalisht që ne duhet ta fitojmë ndeshjen, por në futboll nuk ka gjithmonë: “duhet”. Të dyja ekipet kanë cilësi dhe Dinamo realisht ka bërë mirë, pasi i ka pikët njësoj si ne. Vijmë pas një barazimi shumë të vuajtur në Shkodër dhe ndaj Dinamos luajmë për të marrë fitoren.”
“Unë shoh skuadrën time si favorite, pak më interesojnë ekipet e tjera. Së pari, kam respekt për veten, pastaj për të tjerët, kështu që Teutën e shoh deri në fund pretendente për titullin”, mbylli komentin e tij trajneri Martinti.
