Teuta triumfoi minimalisht 1-0 ndaj Skënderbeut, në atë që mund të quhet edhe si finalja e mbijetesës.
Durrsakët iu falën golit të shënuar nga Toma në pjesën e parë, i cili shkaktoi polemika të mëdha.
Fillimisht arbitri e anuloi për faull ndaj portierit Alia, por pas rishikimit të pamjeve në VAR, ndryshoi vendimin, duke e konsideruar të rregullt golin.
Skënderbeu ishte dominues për gjithë pjesën e mbetur të ndeshjes, por pa arritur të shënojë.
Kjo humbje e dërgon Skënderbeun në vendin e fundit me 30 pikë, ndërsa Teuta ngjitet në vendin e shtatë me 33 pikë.
Trajneri i Teutës, Bledar Hodo doli në prononcim për mediat në fund të sfidës.
“Kishim një ngërç psikologjik dhe shumë të tensionuar sot. E rëndësishme ishte të fitonim dhe shpresoj që të kemi vazhdimësi në këtë lloj situate. Pjesën e parë kishim përgatitur një presion ultra ofensiv, por Skënderbeu nuk e luajti për asnjë moment topin pas.
Megjithatë, vuajtëm shumë, më pëlqeu shumë shpirti i garës së skuadrës. Nëse nuk mposht kundërshtarin direkt është e vështirë. Mendoj që po të shfrytëzonim më mirë goditjet standarte mund të dyfishonim rezultatin. Nuk doja të ndëryja dhe shumë në skuadër, sepse do më pëlqente të merrnin vetë iniciativë lojtarët”, u shpreh Hodo.
Discussion about this post