Triumfuan ndaj Partizanit, flet Ilir Daja: Pas shumë vitesh Dinamo do të shkojë në Europë

Dinamo ka triumfuar përballë Partizanit në supersfidën e vlefshme për javën e 31-të të Superiores.

Pjesa e parë në “Elbasan Arena” u mbyll pa gola, ndërsa e dyta ishte spektakolare.

Zabërgja kaloi në avantazh blutë në minutën e 60-të, ndërsa Jonuzi ishte i pafat pak minuta më vonë, pasi u ndal nga tranversa.

Partizani kishte mundësinë e artë për të barazuar në fund. Të kuqtë fituan penallti në minutën e 94-të, e cila u gabua nga Domgjoni. Gjujatja e mbrojtësit u ndal nga tranversa.

Më këtë fitore, Dinamo mban vendin e dytë me 54 pikë, ndërsa Partizani renditet i katërti me 10 pikë më pak.

Në përfundim të këtij dueli ka folur trajneri fitues, Ilir Daja.

“Ajo që na jep besim për këtë ecuri është maksimumi që japin lojtarët. Ne kishim akoma më shumë mungesa sepse ju shtua edhe Bregu. Jonuzi ka sakrifikuar sepse dje në stërvitje ka nxjerrë pjesën e shpatullës, sot ka luajtur i mobilizuar. Ky është ai element që na jep besim për vazhdimësinë. Pa maksimumin e lojtarëve, një meritë të jashtëzakonshme ka presidenti Bardhi me drejtuesit e Dinamos, pasi kanë krijuar këtë grup me djem dhe lojtarë të mirë.

Dëmtimi i Lorran? Besoj që është një dëmtim që na kushton shumë, sepse Lorran është një nga lojtarët më të mirë. Besoj që të jetë një tërheqje e gradës së parë, por nga shenjat që ka dhe bisedës me mjekët, më thanë që s’mund të themi se në çfarë grade është dëmtimi, por 10 ditë ose 2 javë do të jetë jashtë. Edhe Toli na shqetëson sepse u dëmtua.

Sot me të vërtetë ka qenë një kompleksitet veprimesh që ne bëmë shumë mirë. Pa motivimin maksimal të lojtarëve nuk arrihet asgjë. Ne e përgatisim ndeshjen edhe në raport me kundërshtarin edhe në raport me kontigjentin që kemi ne dispozicion. Por ajo që rezultoi sot ishte që vazhdimësia që patëm në lojë, jo vetëm që morëm 3 pikët, me 99.9%, pas shumë vitesh Dinamo është prezente në Europë. Ajo që më kënaqi më shumë, ishte që lojtarët mbajtën një ritëm dhe treguan personalitet.

Sigurisht që nuk mund të mbash ritëm në gjithë kampionatin. Kjo sepse ne pothuajse kemi luajtur gjithmonë me gjysëm ekipi dhe duke qenë se ke mungesa, duke rikuperuar në manovër dhe lojtarët dhe ndryshimet në role, nuk mundet që të kesh një ritëm të lartë për futbollin shqiptar. Ne e kishim vlerësuar maksimalisht Partizanin”, u shpreh Ilir Daja.