Ish-presidenti i Kosovës, Hashim Thaçi, i cili po gjykohet në Hagë për krime lufte dhe krime kundër njerëzimit, është deklaruar i pafajshëm dhe ka mohuar pretendimet e Prokurorisë.
Në fjalën e tij, ai ka thënë se i vjen keq që në këtë proces gjyqësor nuk mund të dëshmojnë për pafajësinë e tij disa figura të larta si Ibrahim Rugova, Madeleine Albright, Fehmi Agani, Richard Hoolbroke, Adem Demaçi e të tjerë.
“Më vjen keq që nuk do të kemi mundësi që në këtë gjykatë të dëgjojmë dëshmitë e sekretares së shtetit, Medeleine Albright, sekretarit të jashtëm Holdbrooke, Demelio, presidentit Ibrahim Rugova, profesor Fehmi Agani, Adem Demaçi. Ata do të kishin dëshmuar në emrin tim për atë që kam thënë dhe bërë gjatë asaj periudhe shumë të rëndësishme në historinë e lirisë dhe pavarësisë së Kosovës”, ka thënë Thaçi.
Ai ka deklaruar se ‘shtëpia e verdhë’ nuk ka ekzistuar asnjëherë.
Thaçi ka shtuar se historia nuk mund të rishkruhet, dhe se duhet kthyer te dëshmitë, sepse vetëm aty mund të zbulohet e vërteta.
“Kur raporti i Dicky Marty mbushi titujt e lajmeve me akuza të sajuara për trafikim organesh nga Ushtria Çlirimtare të Kosovës dhe nga unë, menjëherë kërkova nga bashkësia evropiane të bëjë një hetim të pavarur. Bashkësia më tha se një gjykatë e veçantë ishte e nevojshme për të hequr renë e zezë të akuzave për trafikim organesh. Bota tani e dinë se si rezultat i procesit se nuk kishte trafikim organesh dhe shtëpia e verdhë nuk ka ekzistuar kurrë. Tani e dimë se edhe unë edhe UÇK dhe gjithë shqiptarët janë shfajësuar. E vërteta është thënë dhe reja e zezë është hequr”, tha mes tjerash ai.
Thaçi tha se kjo është gjykata e katërt që është intervistuar, dhe çdo bashkëpunim i tij me ndërkombëtarët është transparent dhe i drejtë.
Discussion about this post