Thellohen përplasjet në fraksionin e PD-së, që konsiderohet si partia e vulës, për shkak se me një vendim Gjykate, iu dha e drejta e logos dhe vulës së përfaqësimit të Partisë Demokratike.
Gazment Bardhi, sekretar i Përgjithshëm në PD zyrtare, ka kërkuar mbledhjen e Këshillit Kombëtar për vendimin e miratuar me shumicën e votave të Kryesisë lidhur me zgjedhjen e kreut të ri të këtij fraksioni në 29 korrik.
Referuar burimeve, Bardhi ka kërkuar mbledhjen e Këshillit Kombëtar në funksion të zbatimit të statutit të kësaj partie, ku vendimmarrjen përfundimtare e ka ky forum.
Por kërkesa e Bardhit mësohet është kundërshtuar nga të njëjtët anëtarë të kryesisë së PD zyrtare, të cilët të martën në mbrëmje miratuan zhvillimin e zgjedhjeve të brendshme.
Madje këta anëtarë pretendojnë se procesin për zgjedhjen e kryetarit të ri ta menaxhojnë vetë, çka duket se do e çojë këtë fraksion përfundimisht drejt ndarjes me grupin e deputetëve që kryesohen nga Gazment Bardhi.
Në mbledhjen e fundit të kryesisë së PD zyrtare ndodhi edhe përplasja e fortë mes të paktën 4 deputetëve dhe një grupi mbështetësish të Lulzim Bashës, të cilët më pas u etiketuan nga Gazment Bardhi si një grup paramilitar. Këta të fundit krijuan përplasjen me deputetët, duke i sharë dhe fyer ata, pavarësisht se disa orë më pas, vetë Lulzim Basha, deklaroi se dënonte akte të tilla dhune verbale.
Deputeti Dashnor Sula, një prej ligjvënësve që pati përplasjen me grupimin e militantëve, deklaroi se PD nuk vuan për kryetar, por për faktin se nuk ka anëtarë. Madje ai shtoi se kjo pjesë e PD-së nuk ka as Këshillin Kombëtar dhe shumë prej drejtuesve të degëve i janë bashkuar Rithemelimit të drejtuar nga Sali Berisha.
Discussion about this post