Në familjen Rama në Lezhë, problematik nuk ishte vetëm i ndjeri Aldi Rama, 21-vjeçari që vrau veten pasi qëlloi për vdekje nënkomisarin Saimir Hoxha, por edhe xhaxhai i tij i cili është në arrest shtëpie.
Mësohet se, ky i fundit është lënë nga gjykata në “arrest shtëpie” pasi ishte vënë në pranga 6 muaj më parë për tregti të lëndëve piroteknike, por gjatë kontrollit të ushtruar nga policia ditën kur ndërroi jetë Aldi Rama, xhaxhai i tij nuk është gjetur në banesë.
Dyshohet se familjarët i thanë policisë se ai kishte shkuar në Tiranë për të marrë trupin e pajetë të nipit. Ditën e sotme Baki Rama do të dalë para gjykatës në Durrës për t’u njohur me masën e sigurisë. Nipi i tij, Aldi Rama kreu krimin e rëndë tre ditë më parë, teksa ndodhej në arrest shtëpiak të vendosur në maj të këtij viti.
I riu ndodhej në makinë me dy shokë kur u ndalua nga Hoxha dhe dy efektivë të tjerë të cilët po ktheheshin nga operacionin për asgjësimin e lëndëve narkotike në këtë zonë. Në momentin e ndalimit, Rama ka refuzuar kontrollin e Hoxhës ku qëlloi me dy plumba duke i marrë jetën.
Rama nuk ishte një person i panjohur për drejtësinë, pasi ishte arrestuar më parë për shpërndarje droge, ndërsa prindërit i kishte të divorcuar dhe jetonte me gjyshërit.
