Thirrje në kor për Shehin, tifozët e Partizanit “thumbojnë” Tiranën

U luajt mbrëmjen e sotme derbi mes Partizanit dhe Tiranës, sfidë e vlefshme për javën e 6-të të Superiores.

Të kuqtë dolën triumfues me rezultatin 2-1 në një ndeshje të jashtëzakonshme ashtu siç i takon derbit të kryeqytetit.

Gjatë sfidës nuk munguan as tensionet teksa tifozerit e të dyja skuadrave u paralajmëruan disa herë për hedhjen e tymueseve apo copave të stolave të thyer.

Gjithashtu në tribuna tifozët e Partizanit kanë ironizuar shkarkimin e Orges Shehit nga presidenca e Tiranës me në krye Refik Halilin. Tifozët e kuq thërritën në kor emrin e Orges Shehit.

Ky i fundit pas shkarkimit nga drejtuesit e Tiranës është përfolur për një kalim te të kuqtë.

Mesa duket “Ultras Guerrils” bënë hapin e tyre për një kalim të tillë, teksa edhe stoli i tyre është “bosh” pas largimit të Zoran Zekic.