Bojkoti i vendosur nga Dhoma Kombëtare e Avokatisë ndaj seancave gjyqësore dhe masave të sigurisë, duket se nuk është zbatuar të paktën në gjykatat e kryeqytetit.
Në kundërshtim të hartës së re gjyqësore, avokatët kanë vendosur të bojkotojnë pa afat seancat gjyqësore, por braktisja e masave të sigurisë duket se nuk po zbatohet nga të gjithë mbrojtësit, ligjorë në Tiranë dhe rrethe.
Në Gjykatën e Tiranës të enjten janë dhënë 5 masa sigurie për pesë të arrestuar. Këto seanca janë zhvilluar me praninë e avokatëve, ndërsa vijon bojkoti për seancat e tjera gjyqësore. Mbrojtësit ligjorë që morën pjesë në seancat e të enjtes, mësohet të kenë pohuar se nuk kanë qenë në dijeni të vendimit për bojkot. E njëjta gjë ka ndodhur edhe në Gjykatën e Apelit ndërsa në Gjykatën e Lartë janë zhvilluar proceset ne Dhomë Këshillimi.
Avokatët kanë paralajmëruar se bojkoti do të vijojë pa afat deri në kthimin pas të draftit të Këshillit të Lartë Gjyqësor. Kreu i avokatisë, Maks Haxhiaj e ka cilësuar të papranueshëm draftin e hartës së re gjyqësore ndërsa tha se vendimi është i të gjithë avokatëve dhe i pa ndikuar prej tij. Ndërkohë zërat kundër këtij vendimi që janë kryesisht avokatët penaliste kanë njoftuar të premten një takim përpara prokurorisë së posaçme ku do të vendosin se si do te procedojnë me grevën.
Discussion about this post