Edhe pse fitoi Tirana e tij, tekniku Orges Shehi preferoi të mos fliste për mediat, duke ia lënë stafetën Tefik Osmanit dhe ndihmësit të tij, Sebino Plaku. “Panorama Sport” ju sjell disa nga pikantet e kësaj sfide në “Elbasan Arena”.
– Nuk mungojnë kërkesat e veçanta ndaj Aleksit nga ana e tifozëve bardheblu: “Aleks, merri përpara komandant”, thërret njëri nga të pranishmit në stadium.
– Abazaj sjell ankth që në minutën e parë te Tirana, pas një ndërhyrjeje që pëson në mesin e fushës. Mjekët çohen menjëherë në këmbë, por për fat të mirë Abazaj nuk ka asgjë serioze.
– Kapllani në pankinë ankohet për një faull të padhënë ndaj Kapllanit në fushë, por që nuk është i këtij mendimi kryesori. Më pas, Kuka ndal lojën dhe hyjnë mjekët në fushë, ndërsa ia beh trajneri i Erzenit. “Hë pse u vra ai” (duke nënkuptuar se ka marrë një goditje).
– Shehi nuk i beson syve te rasti i humbur i Haxhiut në të 27-ën, duke hedhur bidonin e ujit në tokë nga nervozizmi.
– Kur u mbyll pjesa e parë dhe ekipet po hynin në dhomat e zhveshjes, një tifoz ia behu Aleksit. “O Aleks, foli ndonjë fjalë atij Toshevskit mo, se na fëlliqi fare”, u shpreh tifozi bardheblu.
– Në minutën e 58-të loja ndalet me konsensus për një minutë, për të mundësuar që lojtarët që agjërojnë te konsumojnë diçka. Nga të dyja ekipet kishte një numër të konsiderueshëm lojtarësh të cilët u afruan drejt pankinës të konsumonin diçka.
– Abazaj ishte i shtrirë në tokë dhe nga stoli i Erzenit u bëjnë thirrje lojtarëve që të vazhdojnë lojën dhe ashtu bëjnë.
– Tifozët ekzaltohen te goli i tretë i Hasanit dhe nisin kërkesat e tyre ndaj lojtarit. “Bëji gati birrat kur të mbarojë ndeshja”, thërritën nga tribuna.
– Në fund, i gjithë ekipi afrohet pranë Hasanit me topin e lojës dhe pozojnë së bashku.
– Nuk mungon tensioni nga ana e tifozëve shijakas në stadium, të cilët janë të irrituar me këtë humbje. U desh ndërhyrja e policisë që t’i qetësonte dhe të largohen paqësisht nga ambientet./Panorama/
Discussion about this post