Tmerr për ish-futbollistin e Italisë, grabitësit i drejtojnë pistoletën në sy të fëmijëve

Ish-futbollisti i Udineses dhe trajneri aktual i Carrarese, Antonio Di Natale u grabit me armë në shtëpinë e tij në Empoli mbrëmjen e djeshme.

Mësohet se ishte në shtëpi duke darkuar kur një bandë prej të paktën pesë personash hynë, e mbajtën nën kërcënimin e armës dhe e detyruan të dorëzonte një orë Rolex me vlerë rreth 30,000 euro.

Sipas “La Nazione”, banda po priste në shkurret jashtë shtëpisë, priti që një nga personat e familjes të kthehej në shtëpi dhe më pas i futi brenda ndërsa dera u hap, duke u drejtuar armë dhe thika. Në atë kohë, Di Natale ishte atje me gruan, fëmijët dhe vjehrrin e tij.

Carrarese Calcio 1908 publikoi një deklaratë që konfirmoi se Di Natale ishte grabitur në shtëpinë e tij dhe tregoi solidaritet me trajnerin dhe familjen e tij, të cilët janë të padëmtuar.

Nuk është hera e parë që Di Natale grabitet në shtëpi, pasi diçka e tillë ka ndodhur edhe në vitin 2012.