Në fshatin Shtyllë situata paraqitet alarmante, pasi anëtarët e tre familjeve, dy prej tyre vëllezër, kanë mbetur në qiell të hapur në mes të borës dhe ftohtit, pasi pallati dy katësh u shkrumbua nga zjarri mbrëmjen e të dielës. Shkak i kësaj tragjedie u bë oxhaku i njërës prej banesave. Për të parë nga afër situatën ndërsa zjarri vazhdon ende aktiv në godinë ishte Altin Prifti, administratori i zonës. Por,nga Bashkia tha se ka marrë direktiva vetëm për ushqim e veshmbathje.
“Sot kam kontaktuar me shefin e Emergjencave Civile të Bashkisë, më kanë urdhëruar të marr të dhënat e tre familjeve për sigurimin e ushqimeve dhe veshmbathjeve si hap i parë pastaj do të flitet për akomodimin e tyre. Fshati Shtyllë nuk është në gjendje të mirë ekonomike, do përpiqemi ti ndihmojmë. Momentalisht janë strehuar te të afërmit e tyre. Njësia nuk ka asnjë mundësi, varemi nga Bashkia. Janë familje në nevojë dhe do ti ndihmojmë patjetër“- tha Altin Prifti.
Mes lotësh familjarët e prekur nga kjo fatkeqësi thonë se duan një strehë mbi kokë dhe duan që bashkia t’i ndihmoj jo për bukë dhe veshmbathje, por për banesë ku të rrinë në këto ditë të ftohta dimri.
“Jemi pesë persona në një familje. Ne ramë për të fjetur, atje nga fryu era, nga e zuri shiu, mori oxhakun. Kur dëgjuam kërcisnin dritaret, u hutuam fare. U ngritëm, dolëm jashtë, thirrëm. Mora nusen se e kam shtatzënë, zbrita. Pastaj mora dy çunat edhe pleqtë zbrita poshtë. Tmerr sa s’ka më, s’nxorra një palë çorape. Ndihmë dua, çfarë të bëj, vetë i shtati, ku të vete. Duam që bashkia të na ndihmojë për shtëpi, të fusim kokën. Është shumë ftohtë, ku të rrimë” – shprehet mes lotësh Valdete Ibraj.
“Shtëpinë vjet e bëra të re, 10 milion e ca lekë. Të më ndihmojnë për njëfarë shtëpie. Gruaja u ngrit në 10 e gjysmë të darkës për të folur me djalin dhe më tha o burrë çohu se zjarr. U rashë me gurë xhamave familjes tjetër, çohu se u përvëluam! Dola këmbëzbathur, kur vajta te oxhaku kishin marrë flakë 10-15 mijë metra katrorë. Nuk kishim çfarë bënim, nuk nxorëm dot as plaçkat. Nuk dua lekë nga shteti, as bukë dhe veshmbathje, i lutem të më bëjë një vend që të fus kokën. Dua një shtëpi se është dimri i gjatë, fillon sot dhe përfundon në fund të majit” -tregon Florent Meçkollari.
Mbrëmjen e së dielës, në fshatin Shtyllë flakët kanë përfshirë një pallat, ku jetojnë 3 familje. Fatmirësisht nga zjarri nuk ka pasur të lënduar, por vetëm dëme të shumta materiale dhe pallati aktualisht është i pabanueshëm.
Discussion about this post