Prokuroria e Posaçme i ka komunikuar akuzën ish-kryebashkiakut të Himarës Jorgo Goro e tre ish-zyrtarëve lokal të lidhur me tjetërsimin e pronave përmes së cilave Artan Gaçi, bashkëshorti i ish-ministres Olta Xhaçka, përfitoi statusin e investitorit strategjik.
Goro akuzohet nga SPAK për “Shpërdorim detyre” në bashkëpunim, e prej marsit 2024 ndodhet në burg pasi GJKKO me kërkesë të SPAK caktoi masën e sigurisë “arrest me burg” ndaj tij.
Hetimet e SPAK treguan se Goro në bashkëpunim me Jerasimo Bashin, përcollën pranë organeve kompetente dokumenta të falsifikuara duke bërë të mundur regjistrimin e një sipërfaqe prej 5512 m2 tokë bujqësore, në pronësi të shtetit, në favor të subjektit privat, në pronësi të Foto Mëhillit, i ati i Stavri Mëhillit.
Pas kësaj procedure, të dy ata kanë vijuar me transaksionet për të regjistruar sipërfaqen e tokës në emër të një shoqërie private me përfaqësues Artan Gaçin.
Në total, janë dy sipërfaqe toke të tjetërsuara, të dyja rreth 10 mije m2, tashmë nën sekuestro (lexo).
Lidhur me këtë çështje kreu i kadastrës Vlorë Bilbil Aliaj u la në masën “detyrim paraqitje”, ndërsa ish juristi Vezir Gjikoka si dhe ish drejtori i Drejtorisë së Mbrojtjes dhe Menaxhimit të tokës në Bashkinë Himarë në “arrest në shtëpie”.
Nga ana tjetër, Stavri Mëhilli pronari i tokës, që dyshohet se ka kryer 2 vepra penale, lënë në “arrest me burg”, në mungesë, për shkak se nuk është gjetur për tu arrestuar.
Ndërkohë, Artan Gaçi, pavarësisht se rezulton përfitues fundor i tokës, ndaj tij nuk është ngritur asnjë akuzë.
Pak muaj pas arrestimit, Prokuroria e Posaçme kërkoi një tjetër masë sigurie arresti në burg për Jorgo Goron (lexo) si dhe sekuestroi të 4900m2 tokë që është përfituar nga ish-kryebashkiaku i komanduar i Himarës, Arqile Bollano.
Në një tjetër dosje penale, Jorgo Goro akuzohet për “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”. Bëhet fjalë për një apartament 81.4 m2, që sipas hetimeve ishte pronë e fshehur e ish-kryebashkiakut të Himarës. Prona është vënë nën sekuestro (lexo) me një vendim të Apelit të Gjykatës së Posaçme në fund të muajit Korrik.
Discussion about this post